Áleýmettik jelide Shymkenttegi dámhanalardyń birinde áieldiń telefonyn tartyp alyp, qaitarýdan bas tartqan er adamnyń videosy tarady. Telefonyn mas er adamnan ala almaitynyn túsingen áiel janyndaǵylardan kómek suraidy. Sóz arasynda syra iship otyrǵan er adamnyń byltyr 8 mamyrda gúl satatyn dúkennen gúl urlaǵan eks-politsei ekeni belgili boldy, dep habarlaidy "Ult aqparat" Stan.kz aqparat agenttigine silteme jasap.
Videodan áieldiń er adamnan álde neni ala almai jatqanyn baiqaýǵa bolady. “Tur, meniń telefonymdy ber. Telefonymdy ákel, habarlama kelip jatyr” deidi áiel. Erkekke kúshi jetpeitinin túsingen ol basqa ústelde otyrǵandardan kómek suraidy.
"Myna kisi aityp jatyr me edińder? Ishkenine tólep alsyn. Meniń telefonymdy kepilge tastamaqshy. Jaqsylap telefonǵa túsirshi. Sol gúlge aqsha tólei almaityn jigit qoi", – deidi áiel.
Er adamdardyń áielge arasha túsip, telefonyn qaitaryp berýin talap etkenine qaramastan, ol ózinde eshqandai telefon joq ekenin aityp, janyna eshkimdi jolatpai qoidy. Kómekke kelgenderdiń biri er adamnyń qoldandaǵy telefondy alyp berip edi, áiel bul óziniń telefony emes ekenin, ony er adam jasyryp otyrǵanyn aitty.
"Meniń telefonym, sony ala sal. Saǵan syiladym. Mende telefon joq, kólikte", – deidi er adam.
Videodan áieldiń telefonyn qaitaryp berýge kómekteskenderdiń biri miz baqpai syra iship otyrǵan er adamnyń jaǵasynan alyp jatqanyn kórýge bolady. Bolǵan jaǵdaidyń nemen aiaqtalǵany belgisiz. Shymkent qalasynyń politsiia departamenti tilshiniń oqiǵaǵa qatysty túsinikteme berýi týraly suraýyn ázirge jaýapsyz qaldyrdy.
Eske sala keteiik, ótken jyldyń 8 mamyrynda er adam floristi qorlap, dúkennen gúl shoǵyn alyp ketken.
Turan APB-nyń 102 arnasyna qońyraý túsken. Alaida dúken iesi mán-jaidy naqtylaý barysynda ýchaskelik inspektorlarǵa eshkimge shaǵymy joqtyǵyn aityp, aryz jazýdan bas tartqan.
Bul jaitqa qatysty Turan APB-da QR QK-niń 191-baby 2-bóligi 1-tarmaǵymen "Jábirlenýshiniń ómirine n/e densaýlyǵyna qaýipti emes kúsh qoldanyp tonaý" sotqa deiingi tergeý bastaldy.
Sondai-aq istiń aq-qarasyn ajyratý kezinde qara fýtbolka kigen azamat aǵymdaǵy jyldyń 19 mamyrynda otbasylyq sebepterge bailanysty óz ótinishimen ishki ister organdarynan bosatylǵan Qarataý APB-nyń burynǵy qyzmetkeri ekeni anyqtaldy.
