Búgin Ońtústik Qazaqstan oblysynda «Eńbek kúnine» arnalǵan jumyskerler men eńbek dinastiialarynyń oblystyq forýmy ótti, dep habarlaidy óńirlik ákimdiktiń baspasóz qyzmeti.
Saltanatty jiynǵa qatysqan oblys ákimi Janseiit Túimebaev barsha eńbek qyzmetkerlerin kásibi merekemen quttyqtap, osy salada uzaq jyldar eńbek etken ardagerler men qyzmetkerlerdi marapattady.
«Elbasy Nursultan Nazarbaevtyń «Bolashaqqa baǵdar: rýhani jańǵyrý» atty maqalasy men «Máńgilik el» ideiasy, «Jalpyǵa Ortaq Eńbek Qoǵamyna qarai 20 qadam» eńbegi qoǵamda úlken serpilis týǵyzyp, el damýynyń uzaq merzimdi baǵdarlaryn aiqyndady. Bizdiń qazirgi qol jetkizgen jetistikterimiz - baspaldaq ispetti. Onyń árbir baspaldaǵy qurylysshy, ustaz, dáriger, ǵalym, aspazshy, saqshy, eginshi, qarapaiym jumysshynyń eńbegimen, onyń mańdai terimen quralatyny aidan anyq. Qazirgi tańda elimizdiń ekonomiqalyq qýatyn arttyrýǵa, mádeni murasyn jańǵyrtyp, rýhani álemin baiytýǵa ólsheýsiz úles qosyp otyrǵan Ońtústik azamattary biz úshin maqtanysh», - dedi ákim.
Bul kúni óz salasynda talmai eńbek etip, óz isiniń bilgiri atanǵan 27 azamatqa oblys ákiminiń Gramotasy men Alǵys haty, oblystyq «Nur Otan» partiiasynyń alǵys haty, QR «Kásipodaqtarǵa sińirgen eńbegi úshin» jáne «Bilim jáne ǵylym qyzmetkerleriniń kásipodaǵyna sińirgen eńbegi úshin» belgisi tabystaldy. Sondai-aq, merekelik jiynda «Eńbek joly» konkýrsynyń jeńimpazdary da qurmet pen qoshemetke bólendi.
Aita ketý kerek, jumys berýshilerdiń eńbek zańnamasy talaptaryn saqtaýyn yntalandyrý maqsatynda 2016 jyly alty, al, 2017 jyly on kásiporynǵa, máselen, «Standart tsement», «Ordabasy qus» «Zavod Triýmf MMS» JShS-gi syndy birqatar óndiris oryndaryna senim sertifikaty tabys etilgen.
Oblysta urpaqtan-urpaqqa otbasylyq qundylyqtardy jetkizip, joǵary kásibi mamandar ázirleýge úlken úles qosyp otyrǵan eńbek áýletteri jeterlik. Mysaly úshin, Arys qalasynda eńbek ótili 475 jyl bolatyn temirjolshy Jańabaevtar dinastiiasy turady. Temirjol salasynda urpaqtan-urpaqqa jalǵasyp eńbek etip kele jatqan bul áýlette 17 temirjolshy bar. Munan bólek, Ordabasyda eńbek ótili 600 jyldy quraityn ustazdar dinastiiasy turady. Ysqaqovtar áýletiniń 20 múshesi muǵalimdikti meńgergen.
Sonymen qatar, Saryaǵash aýdanyndaǵy Iýsýpovtar januiasy qarjy mamandyǵyn tańdap, óńir ekonomikasynyń damýyna aitarlyqtai úles qosyp keledi. Eńbek ótili 128 jyldy quraityn qarjygerler dinastiiasynda bes azamat osy salada qyzmet atqarady. Al Túrkistan qalasyndaǵy Orazbahovtar áýleti ata jolyn qýyp, ormanshy mamandyǵyn meńgerip elimizdegi «Jasyl el» baǵdarlamasynyń iske asýyna óz úlesterin qosýda. Bul otbasynyń osy salada 46 jyldyq eńbek ótili bar.
Jalpy oblysta Nátijeli jumyspen qamtýdy jáne jappai kásipkerlikti damytýdyń 2017 - 2021 jyldarǵa arnalǵan memlekettik baǵdarlamasy boiynsha jyl basynan beri 29,5 myń adam jumyspen qamtylsa, onyń 19,2 myńy jastar.
