Shymkentte dárigerler úsh ailyq náresteniń tynys jolynan túireýishti alyp shyqty, dep habarlaidy "Ult aqparat" Densaýlyq saqtaý ministrligine silteme jasap.
Shymkent qalasyndaǵy balalar klinikalyq aýrýhanasyna tynys alý jolynda bógde zat bar degen kúdikpen úsh ailyq qyz bala jedel járdem kóligimen jetkizilgen.
Náresteni shuǵyl túrde teksergen dárigerler rentgenogramma jasaǵan. Tekserý qorytyndysynda traheianyń joǵarǵy úshten bir bóliginde túireýish turǵany anyqtaldy. Balanyń ishindegi qaýipti zatty alyp shyǵý úshin aýrýhanadaǵy bilikti hirýrg - A.Túlkibaev, N.Qoianbaev jáne anestiziolog dárigeri B.Totyqov shuǵyl túrde operatsiia jasaǵan.
«Ota kezinde fibrobronhoskop arkyly kirip, ishtegi túireýishti alyp shyqtyq. Operatsiia tiliksiz ótti. Balanyń jalpy jaǵdaiy jaqsy, emdeý hattamasyna sáikes qajetti em alýda» - deidi ota jasaǵan dáriger A.Túlkibaev.
Mamandardyń aitýynsha, ortalyqqa bógde zat jutyp qoiǵan balalar jii kelip túsedi. Bógde zattar aýyz qýysy men jutqynshaq arqyly ótip, traheia men bronhqa enedi. Iri bóten deneler óńesh arqyly óte almaidy. Bógde denelerdiń kóbisi ádette usaq (monshaq, burshaq, tyrnaq, túime, ine, túireýish, súiek, usaq tiyndar). Úlken bóten deneler nemese ótkir formasy bar zattardyń traheianyń qabyrǵalaryna nemese negizgi bronhtyń qabyrǵalaryna, al sol jaqqa qaraǵanda oń jaqta jii turyp qalý qaýpi óte joǵary.
Balalardyń bronhy men traheiasyna ártúrli zattar turyp qalýy múmkin: dán, túime, túireýish, qaǵaz qystyrǵysh, tyrnaq, oiynshyq bólshekteri jáne taǵy basqalar.
«Mundai jaǵdailar kóbinese ata-ananyń qaraýynsyz qalǵan balalarda jii kezdesedi», deidi dárigerler.
