Shymkentte tamaqtaný oryndary ázirge ashylmaidy. Qala ákiminiń orynbasary Maqsut Isahov áleýmettik paraqshasynda osyndai málimdeme jasady, – dep habarlaidy "Ult aqparat".
Sheneýniktiń bulai jazýyna el ishinde tarap jatqan qaýeset sebep bolǵan. Turǵyndar bir-birine elde tótenshe jaǵdai alynyp tastalǵan soń meiramhanalar men dámhanalar jappai ashylady dep jalǵan aqparat taratqan.
«Keibir áleýmettik jelilerde qoǵamdyq tamaqtaný oryndary (ashana, kafe, restoran, barlar) jáne sport zaldary ashylady degen habarlama tarap, tipti keibir kásipkerlerimiz daiyndyqqa kirisip ketipti. Ákimdik tarapynan ázirge ondai qaýly qabyldanyp, sheshim shyqpady. Ózderińizge belgili, memleket basshysy nysandardy retimen iske qosýǵa tapsyrma bergenimen, qalalarda ol protsess epidemiologiialyq jaǵdaiǵa bailanysty júzege asady. Bárimiz karantinniń aiaqtalýyn asyǵa kútip, saiabaq, bazarǵa shyqqanymyzǵa qýanyp, sanitarlyq talaptardy eskerýsiz qaldyryp jatyrmyz. Ókinishke qarai, qalamyzda koronavirýs infektsiiasyn juqtyrǵandar sany kóbeiýde. Sol sebepti qaladaǵy barlyq nysanǵa sanitarlyq talaptardyń oryndalýy boiynsha monitoring júrgizilip, nátijesinde birqatar shekteýler qoiylady», - dedi Maqsut Isahov.
Aita keteiik, buǵan deiin qalanyń bas sanitary Ábdimanap Tólebaev shyǵarǵan qaýlyda kópshilik tamaqtanatyn oryndar men meshittiń ashylýyna tyiym salynǵan bolatyn. Oǵan koronavirýs juqtyrǵandardyń sany kúrt kóbeiip ketkeni sebep bolǵan edi. Búginde qaladaǵy kásiporyndarda koronavirýs infektsiiasyna qarsy skrining diagnostikalyq tekserý jumystary júrgizilip, qoǵamdyq kólik qyzmeti ókilderi de synama tapsyrýda.
Aita keteiik, shym shaharda sońǵy táýlikte 31 adam indet juqtyrǵan. Al jalpy naýqastar sany - 539.
