Foto: Alina Túleýbaeva/Kazinform
Qarjylyq monitoring agenttigi qylmystyq jolmen alynǵan 358 million teńgeden astam qarajatqa satyp alynǵan jyljymaityn múlikti memleket kirisine tárkiledi.
QMA Shymkent qalasy boiynsha departamenti óńirdiń laýazymdy tulǵalaryna jáne «Qýatjylýortalyq-3» MKK-ǵa qatysty smetalyq qunyn arttyrý, sondai-aq naqty oryndalmaǵan jumystar úshin aqy tóleý arqyly qaladaǵy jylý jelileri men elektr berý jelilerine jóndeý júrgizýge bólingen 1,1 milliard teńgeden astam biýdjet qarajatyn jymqyrý faktisi boiynsha sotqa deiingi tergeýdi aiaqtady.
Sonymen qatar, kúdiktiler laýazymdy adamdar urlanǵan qarajatty jylystatý úshin «qolma-qol aqsha jasaýshylar» tobyn tartty. Olar 7% mólsherinde aqshalai syiaqy úshin bógde tulǵalarǵa resimdelgen 24 kúmándi kásiporyn arqyly taýarlardy jetkizý jáne qyzmet kórsetý jónindegi mámileler týraly jalǵan qujattar (shot-faktýralar, júkqujattar, oryndalǵan jumys aktileri, sharttar) usyndy. Paralleldi qarjylyq tergeý sheńberinde qylmystyq jolmen alynǵan qarajatqa satyp alynǵan jyljymaityn múlikter, atap aitqanda, Shymkent jáne Astana qalalaryndaǵy 2 páter, 1 turaq orny, Shymkent qalasyndaǵy 3 jeke úi jáne bank shottaryndaǵy tyiym salynǵan 50 million teńge anyqtalyp, tárkileý maqsatynda sot sanktsiiasymen tyiym salyndy.
Sot úkimimen barlyq jeti aiyptalýshy 2 jyldan 7,5 jylǵa deiin bas bostandyǵynan aiyryldy.
Shymkentte jekemenshiktegi keibir áleýmettik nysandar memleketke qaitarylyp jatqanyn jazǵan bolatynbyz.
