Shymkent qalasynda koronavirýs juqtyrǵan bir adamnyń jaǵdaiy aýyr. 12 naýqastyń jaǵdaiy birqalypty. Bul týraly Shymkent qalasy taýarlar men qyzmetterdiń sapasyn jáne qaýipsizdigin baqylaý departamenti basshysy Ábdimanap Túgelbaev aitty.
Bul qalada barlyǵy 14 adamnan virýs tabylǵan. 5 sáýirde bir adam qaitys boldy. Ol Máskeýden Almaty júk kóligimen bara jatqanda ystyǵy kóterilip, Shymkentke jetken soń jedel járdem shaqyrǵan. 28 naýryzda ol Shymkent qalasy juqpaly aýrýlar aýrýhanasyna jatqyzylǵan. Keiin jaǵdaiy kúrt nasharlap, jasandy tynys alý apparatyna qosylǵan. Er adam 5 sáýir tún aýa qaitys bolǵan. Densaýlyq saqtaý basqarmasy marqumnyń buryn týberkýlezben aýyrǵanyn, pnevmoniia men qant diabeti shaldyqqanyn aitady. Koronavirýs onyń jaǵdaiyn qiyndatyp jibergen.
Al Qaraǵandy oblysy densaýlyq saqtaý basqarmasynyń habarlaýynsha, aimaqta koronavirýs juqtyrǵan úsh naýqastyń jaǵdaiy aýyr, bireýiniń jaǵdaiy ortasha aýyr. Olar jansaqtaý bóliminde jatyr. Basqarma tórt naýqas ta buryn koronavirýstan kóz jumǵan qaraǵandylyqpen bailanysta bolǵanyn aitady.
5 sáýirdegi derekke sai, Qaraǵandy oblysynda 31 adamnan virýs tabyldy. Onyń bireýi qaitys boldy.
Qazaqstanda qazir 569 adamnan koronavirýs tabyldy. 36 adam dertten aiyqty. Alty adam qaitys boldy.
Densaýlyq saqtaý ministri Eljan Birtanov sáýirdiń alǵashqy on kúninde elde virýs taraý shegine jetip, keiin azaia bastaidy dep boljaidy. Ministrdiń esebinshe, elde 3500 adamǵa virýs juǵýy múmkin.
Qazaqstanda 15 sáýirge deiin tótenshe jaǵdai. Eldiń basym bóliginde karantin.
