188 adam ýlanyp qalǵan balmuzdaqty satatyn kásipkerdiń arnaiy ruqsat qaǵazy bolmaǵan. Qyzmetkerleriniń tek bireýinde ǵana meditsinalyq qujaty bar. Arnaiy tekserýden ótken 12 qyzmetkerdiń ekeýi salmonellez infektsiiasyn juqtyrýy múmkin. Al balmuzdaqtan ushynǵan 188 naýqastyń 28-de salmonellez rastalǵan, dep jazady otyrar.kz.
Qalǵandarynyń taldaýlary saraptalyp jatyr. Ushynǵan 188-diń 101-i eresekter, 39-y 14 jasqa deiingi balalar, 48-i jasóspirimder. Búginde aýrýhanada 89 naýqas em-domyn jalǵastyrýda. Resmi málimdeme jasaýǵa asyqpaǵan jaýapty mekeme basshylary búgin tilshilerdiń basyn qosyp, eldiń nazaryn aýdartqan másele týraly brifing ótkizdi.
Ońtústiktiń ǵana emes, eldiń nazaryn aýdartqan "Iýjnoe" dúńgirshegi qansha ýaqyttan beri balmuzdaq satyp kelgenin naqty eshkim bilmeidi. Tergeý anyqtaýy tiis eken. Arnaiy ruqsat qaǵazyn alýdy qup kórmegen kásipkerlik nysannyń 25 óniminiń 24-de salmonellez anyqtalǵan.
"Balmuzdaq Kommýnizm eldimekenindegi óz úiinde daiyndalyp, "Iýjnoe" dep atalatyn dúńgirshekke jetkizilip otyrǵan. Sanitarlyq-gigienalyq talaptar saqtalmai, polietilen paketterde tasymaldanǵan. Ruqsat qaǵazdarynan tek merzimi ótip ketken qurǵaq sútke alynǵan qujatty kórsetti. Dezinfektsiialyq rejim saqtalmaǵan", — deidi OQO qoǵamdyq densaýlyq saqtaý departamentiniń basshysy Nurbek Nyshanov.
"Eshkim aqparatty jasyrǵan joq. Biz OQO qoǵamdyq densaýlyq saqtaý departamenti qyzmetkerlerimen birlesip, naqty málimetter daiyndadyq. Arnaiy taldaýlar jasaldy", — dedi óz kezeginde OQO densaýlyq saqtaý basqarmasynyń basshysy Muqan Egizbaev.
OQO kásipkerler palatasynyń ókilderi de búgingi basqosýda tóbe kórsetti. Shymkentte 50-den astam balmuzdaq satatyn oryn tirkelgen degen olar arnaiy jumys tobyn quryp, naqty iske kóshipti.
