188 ادام ۋلانىپ قالعان بالمۇزداقتى ساتاتىن كەسٸپكەردٸڭ ارنايى رۇقسات قاعازى بولماعان. قىزمەتكەرلەرٸنٸڭ تەك بٸرەۋٸندە عانا مەديتسينالىق قۇجاتى بار. ارنايى تەكسەرۋدەن ٶتكەن 12 قىزمەتكەردٸڭ ەكەۋٸ سالمونەللەز ينفەكتسيياسىن جۇقتىرۋى مٷمكٸن. ال بالمۇزداقتان ۇشىنعان 188 ناۋقاستىڭ 28-دە سالمونەللەز راستالعان, دەپ جازادى otyrar.kz.
قالعاندارىنىڭ تالداۋلارى ساراپتالىپ جاتىر. ۇشىنعان 188-دٸڭ 101-ٸ ەرەسەكتەر, 39-ى 14 جاسقا دەيٸنگٸ بالالار, 48-ٸ جاسٶسپٸرٸمدەر. بٷگٸندە اۋرۋحانادا 89 ناۋقاس ەم-دومىن جالعاستىرۋدا. رەسمي مەلٸمدەمە جاساۋعا اسىقپاعان جاۋاپتى مەكەمە باسشىلارى بٷگٸن تٸلشٸلەردٸڭ باسىن قوسىپ, ەلدٸڭ نازارىن اۋدارتقان مەسەلە تۋرالى بريفينگ ٶتكٸزدٸ.
وڭتٷستٸكتٸڭ عانا ەمەس, ەلدٸڭ نازارىن اۋدارتقان "يۋجنوە" دٷڭگٸرشەگٸ قانشا ۋاقىتتان بەرٸ بالمۇزداق ساتىپ كەلگەنٸن ناقتى ەشكٸم بٸلمەيدٸ. تەرگەۋ انىقتاۋى تيٸس ەكەن. ارنايى رۇقسات قاعازىن الۋدى قۇپ كٶرمەگەن كەسٸپكەرلٸك نىساننىڭ 25 ٶنٸمٸنٸڭ 24-دە سالمونەللەز انىقتالعان.
"بالمۇزداق كوممۋنيزم ەلدٸمەكەنٸندەگٸ ٶز ٷيٸندە دايىندالىپ, "يۋجنوە" دەپ اتالاتىن دٷڭگٸرشەككە جەتكٸزٸلٸپ وتىرعان. سانيتارلىق-گيگيەنالىق تالاپتار ساقتالماي, پوليەتيلەن پاكەتتەردە تاسىمالدانعان. رۇقسات قاعازدارىنان تەك مەرزٸمٸ ٶتٸپ كەتكەن قۇرعاق سٷتكە الىنعان قۇجاتتى كٶرسەتتٸ. دەزينفەكتسييالىق رەجيم ساقتالماعان", — دەيدٸ وقو قوعامدىق دەنساۋلىق ساقتاۋ دەپارتامەنتٸنٸڭ باسشىسى نۇربەك نىشانوۆ.
"ەشكٸم اقپاراتتى جاسىرعان جوق. بٸز وقو قوعامدىق دەنساۋلىق ساقتاۋ دەپارتامەنتٸ قىزمەتكەرلەرٸمەن بٸرلەسٸپ, ناقتى مەلٸمەتتەر دايىندادىق. ارنايى تالداۋلار جاسالدى", — دەدٸ ٶز كەزەگٸندە وقو دەنساۋلىق ساقتاۋ باسقارماسىنىڭ باسشىسى مۇقان ەگٸزباەۆ.
وقو كەسٸپكەرلەر پالاتاسىنىڭ ٶكٸلدەرٸ دە بٷگٸنگٸ باسقوسۋدا تٶبە كٶرسەتتٸ. شىمكەنتتە 50-دەن استام بالمۇزداق ساتاتىن ورىن تٸركەلگەن دەگەن ولار ارنايى جۇمىس توبىن قۇرىپ, ناقتى ٸسكە كٶشٸپتٸ.
