Kórneki foto: muftyat.kz
Shymkentte balalardy sabaǵan meshit ustazy jumysynan bosatyldy. Bul týraly Qazaqstan musylmandary dini basqarmasynyń baspasóz hatshysy Aǵabek Qonarbaiuly Facebook-tegi paraqshasynda habarlady.
"Áleýmettik jelide mektep jasyndaǵy kishkentai eki balanyń dene jaraqatyn alǵan videosy tarap, oqyrmandar tarapynan túsinbeýshilik týyndap jatyr. Keibir oqyrmandar bul oqiǵa medresede bolǵan degen pikir jazýda. Qazaqstan musylmandary dini basqarmasy oqiǵanyń anyq-qanyǵyna kóz jetkizdi.
Oqiǵa Shymkent qalasynda bolǵan. Túrkistan oblysy Saryaǵash aýdanynyń turǵyndary – aǵaly-inili Seiitqoja, Esenqoja Eshmuratovtar óz uldary Batyrhan men Álihanǵa synyptasy – «Taspaý Sálimbai» meshitiniń ustazy Rústem Asqarovqa úi jaǵdaiynda dini sabaq berýdi ótinedi. Ókinishke qarai «Taspaý Sálimbai» meshitiniń ustazy Rústem Asqarov ózge turmystyq máseleler boiynsha ashýlanyp, óz emotsiiasyn tizgindei almai, kámeletke tolmaǵan balalarǵa qol jumsaǵan.
Birinshiden, bul oqiǵa medresede bolmaǵan. Ekinshiden, «Quran súrelerin durys oqymaǵany úshin balalardy urdy» degen pikir shyndyqqa janaspaidy. Osy rette oqyrmandardan máseleniń anyq-qanyǵyna kóz jetkizbei turyp aldyn-ala boljam aitýǵa asyqpaýdy suraimyz" - dep jazdy ol.
Aǵabek Qonarbaiulynyń aitýynsha, «Taspaý Sálimbai» meshitiniń ustazy Rústem Asqarov kámeletke tolmaǵan balalardy úi jaǵdaiynda oqytyp, olarǵa qol jumsap, din qyzmetkeriniń etikasyn (musylmandyq, ustazdyq ádepti saqtamaý, ózgelerge ziian tigizý t.b.) qatań buzǵan.
"Qazaqstan musylmandary dini basqarmasy bul oqiǵadan tiisti qorytyndy shyǵardy jáne óreskel áreketke jol bergen din qyzmetkerine shara qoldandy. Búgin, 2023 jyldyń 15 maýsymynda Rústem Asqarov Bas múfti buiryǵymen «Taspaý Sálimbai» meshitiniń ustazy qyzmetinen bosatyldy. Qazir bul máselemen quqyq qorǵaý organdary ainalysyp jatyr" - dep túiindedi múftiiattyń baspasóz hatshysy.
video: Facebook/Jemis Aitjankyzy
