28 naýryz túngi saǵat 00.00-den bastap Shymkent qalasynda koronavirýsqa bailanysty áýejai men temirjol vokzalynyń jumysy tolyq toqtaidy. Bul týraly Qazaqstanda koronavirýspen kúres shtaby habarlady.
Senbiden bastap kólik bazarlary, azyq-túlik jármeńkeleri, uialy telefon dúkenderi jabylady. Qalada tómendegidei shekteý sharalary engiziledi:
- Turǵyn úilerde, aýdandarda, dini birlestikterde jeke, otbasylyq jáne basqa sharalardy ótkizýge qatań tyiym salynady;
- Saýda nysandaryna baratyn adamdar, satýshylar meditsinalyq maska taǵýy tiis, sanitarlyq-dezinfektsiialyq sharalardy kúsheitýi kerek;
- Mal bazarlary jeksenbi kúni ǵana saǵat 11.00-den 17.00-ge deiin jumys isteidi;
- Qoǵamdyq tamaqtandyrý oryndary saǵat 10.00-den 18.00-ge deiin isteidi;
- Qoǵamdyq tamaqtandyrý oryndary kireberiste tutynýshylardyń temperatýrasyn tekserip, qoldy dezinfektsiialaýǵa múmkindik berýi tiis;
- 21.00-den 7.00-ge deiin Shymkent qalasynyń aýmaǵyna kirýge jáne shyǵýǵa tyiym salynady;
- Qoǵamdyq kólikter tańerteńgi saǵat 6.00-den 21.00-ge deiin jumys isteidi.
Shymkentte eki adamnan koronavirýs tabylǵan. Virýs juqtyrǵan birinshi adam 24 naýryz kúni túnde anyqtalǵan. 24 jastaǵy er adam qalaǵa 20 naýryz kúni avtobýspen Nur-Sultan qalasynan kelgen. 25 naýryzda onyń anasynan da koronavirýs tabyldy.
Qala ákimi Shymkentte virýs juqtyrǵan adammen birge Nur-Sultannan 51 adam kelgenin, olardyń tórteýi Shymkentke túsip, qalǵany Túrkistan oblysynyń Jetisai qalasyna ketkenin aitqan.
Qala ákimi qazirge qalaǵa karantin jariialaýǵa negiz joq dep málimdedi. 25 naýryzda qaladaǵy barlyq halyqqa qyzmet kórsetý ortalyqtary jumysyn ýaqytsha toqtatty.
Sońǵy derek boiynsha, Qazaqstanda koronavirýs juqtyrǵandar 121 adamǵa jetti.
