Foto: QR Qorǵanys ministrligi
QR Ulttyq ulanynyń "Ońtústik" óńirlik qolbasshylyǵy Shymkenttegi áskeri qyzmetshiniń qazasy týraly mán-jaidy habarlady.
"15 maýsymda 6506 áskeri bóliminiń jaýyngerlik daiarlyq josparyna sáikes áskeri qyzmetshilermen qashyqtyqty jaiaý eńserý boiynsha júgirý jattyǵýlary ótkizildi. Is-shara aiaqtalǵannan keiin áskeri qyzmetshi B. ózin nashar sezindi jáne oǵan dereý alǵashqy meditsinalyq kómek kórsetildi.
Ári qarai ol Shymkent qalasynyń Birinshi qalalyq klinikalyq aýrýhanasyna jetkizilip, reanimatsiia bólimshesine jatqyzyldy. Kelesi kúni saǵat 17:15 shamasynda áskeri qyzmetshiniń qaitys bolǵany anyqtaldy", - dedi QR Ulttyq ulany "Ońtústik" óńirlik qolbasshylyǵynyń baspasóz qyzmeti ókilderi.
Oqiǵanyń sebepteri men mán-jaiyn anyqtaý úshin qyzmettik tergeý taǵaiyndalǵan.
"Ońtústik" óńirlik qolbasshylyǵynyń jáne QR Ulttyq ulanynyń 6506 áskeri bólimi qolbasshylyǵy áskeri qyzmetshiniń týystary men jaqyndaryna kóńil aitady", - delingen habarlamada.
QR QIJK-niń 201-babyna sáikes basqa aqparat tergeý múddesi úshin jariia etilmeidi.
