Foto: Polisia.kz
Shymkenttik qariialar "gipnozdyń" áserinen alaiaqqa bar jiǵan-tergenin berip qoiǵan, - dep habarlaidy "Ult aqparat" Polisia.kz-ke silteme jasap.
Alaiaqtyqtyń qurbandary 73 jáne 68 jastaǵy jergilikti turǵyndar bolyp shyqty. Eki jaǵdaida da belgisiz áiel úidi satyp alý úshin, kórýge kelgen. Áńgimelesý barysynda jalǵan satyp alýshy ájelerge otbasyna dýa jasalǵanyn jáne ony tez arada joimasa, bir jamandyq bolatynyn aityp sendirgen. Tazartý rásimin ótkizý úshin ol altyn men “qarańǵy bólmedegi qaraly kúnge jinaǵan aqshany” suraǵan. Keltirilgen jalpy shyǵyn kólemi – 600 myń teńge.
"Qala turǵyndary esin jinaǵan boida dereý politsiiaǵa habarlasyp, bolǵan jaidy jetkizdi.
Jábirlenýshilerdiń aitýynsha, kúdikti "gipnozdy" qoldanǵan, óitkeni olardyń ózderi mundai alaiaqtyqqa qalai túskenin túsinbeidi.
Kúdiktini Eńbekshi aýdandyq politsiia basqarmasynyń jedel ýákilderi izin sýytpai ustady. Buǵan jedel basqarý ortalyǵynyń kameralary kómektesti" - delingen media-portal málimetinde.
Ustalǵan azamatsha megapoliste alaiaqtyq jasaýǵa bel býǵan Almaty qalasynyń turǵyny bolyp shyqty. Ol óziniń qurbandaryn tek egde jastaǵy, sengish azamattardyń arasynan tańdap alǵan.
Shymkent politseileri alaiaqtardyń mundai ailasyna túsip qalmas úshin turǵyndarǵa beitanys adamdarǵa senbeýge, baǵaly zattaryna abai bolýǵa keńes beredi.
