Shymkentte aǵashtaǵy qardy túsirýge qomaqty qarjy bólingeni týraly aqparat shyndyqqa janaspaidy. Bul týraly Shymkent qalasy ákiminiń orynbasary Erǵali Bilisbekov aityp ótti, dep habarlaidy QazAqparat.
Áleýmettik jelilerde Shymkentte aǵashtardyń qaryn silkip, túsirýge biýdjetten 600 million teńge qarjy bólingeni týraly aqparat tarady.
Osyǵan bailanysty qala ákiminiń orynbasary Erǵali Bilisbekov aqparattyq-kommýnikatsiialar ortalyǵynda brifing berdi.
Ákim orynbasary Shymkent qalasynyń 2022-2024 jyldarǵa arnalǵan biýdjeti Qazaqstan Respýblikasynyń tiisti zańdarynda kórsetilgen talaptarǵa sáikes qalyptastyrylatynyn jáne qalanyń jasyl jelekterin kútip ustaý, jańa aǵashtar otyrǵyzý, merzimdik dárileý, sýarý, butaý, aqtaý jáne qardan tazartý sekildi birneshe jumysty qamtitynyn jetkizdi.
Sondai-aq, osy jumystardy atqaratyn azamattardyń eńbekaqysy, sol jumysqa paidalanylatyn kólik pen arnaiy tehnikanyń janar-jaǵarmaiy men ózge de shyǵyndary kiretinin aitty.
«Shymkent qalasynyń territoriiasy 116 myń gektardy alyp jatyr. Qazirgi ýaqytta qala aýmaǵynda 6 millionnan astam túp aǵash bar. Budan bólek, qala aýmaǵynda 8 saiabaq pen 39 gúlzar bar. Al, maqalada kórsetilgen qardy silkip túsirý jumystary jalpy jasyl jelekti kútip ustaý jumystarynyń kóptegen baǵyttarynyń bir tarmaǵy ǵana. Iaǵni, mundai jumystar qaýipsizdik maqsatynda adamdar jii júretin kópshilik oryndardaǵy 66 220 túp aǵashta júrgiziledi dep josparlanyp, qarjylyq smetalyq shyǵyndary 891,4 myń teńge (600 million emes) qaralǵan», - dedi Bilisbekov.
Al, eger qys mezgilinde qar jaýmaǵan jaǵdaida bul qarjy tolyqtai biýdjetke keri qaitarylady.
Qala ákiminiń orynbasary jelide taralǵan aqparat shyndyqqa janaspaitynyn aityp, BAQ ókilderinen resmi jáne shynaiy aqparatty taratýǵa shaqyrdy.
