QAZAQ AIR áýe kompaniiasynyń baspasóz qyzmeti ushaq salonynda áiel jolaýshynyń qaitys bolǵanyn rastady.
Kompaniia baspasóz qyzmetiniń habarlaýynsha, oqiǵa 14 qyrkúiek kúni Nur-Sultan – Shymkent baǵytyndaǵy reiste bolǵan.
«Ushý kezinde salonnyń ekipajy jolaýshynyń naýqas jáne shuǵyl kómekke muqtaj ekeni týraly aqparat aldy. Bortserik jolaýshy otyrǵan orynǵa jaqyndaǵanda jolaýshy es-tússiz jatqan. Tekserý kezinde tamyr soǵysy (pýls) men tynys alý belgileri bolǵan joq. Ushaqtyń komandirine málimet berilip, jolaýshylar kómekke shaqyryldy. Jolaýshylar arasynda bolǵan dáriger úndeýge qulaq asyp, nusqaýlyq boiynsha bortserikpen birge júrek-ókpe reanimatsiiasyn jasady», - dep baiandaidy oqiǵa týraly kompaniia.
Aqyry ushaq komandiri jaqyn mańdaǵy áýejaiǵa qoný týraly sheshim qabyldaidy.
«Ekipaj áýe dispetcherleri arqyly jedel járdem shaqyrdy. Jezqazǵan qalasynyń áýejaiyna kelgen dárigerler «ólim» týraly resmi habarlady. QAZAQ AIR jolaýshynyń otbasy men jaqyndaryna qaiǵysyna ortaqtasyp kóńil aitady», - dep jazady QAZAQ AIR kompaniiasynyń baspasóz qyzmeti.
