Shymkentte tolassyz jaýǵan jańbyr saldarynan sý shaiǵan Eltai aýylynda qaýip seiildi. Tabiǵi apattan atalǵan eldi mekende 60 aýla men 60-qa tarta nysandy sý basyp, 5 sharýashylyq nysan qiraǵan, dep habarlaidy "Ult aqparat".
Qalalyq TJD málimetinshe, tabiǵi apattyń saldaryn joiý boiynsha jedel shtab qurylǵan. Sondai-aq, №6506 áskeri bóliminiń kúshimen kanaldardy tazalaý, tereńdetý jáne arnany túzetý jumystary júrgizilýde. Qazirgi tańǵa deiin 7000 m3 sý sorylǵan.
«Sý basqan aýmaqtan 300 adam, onyń ishinde 124 bala evakýatsiialandy. 294 adam týysqandaryna jáne 6 adam №119 OM bazasynda evakýatsiialyq pýnktke ornalastyryldy. Oqiǵa ornyna jaqyn mańdaǵy 4 mektepte qosalqy evakýatsiialyq pýnkt daiyndalyp, tótenshe jaǵdaidyń saldaryn joiý jumystary júrgizilýde. Oǵan TJD 133 qyzmetkeri 10 tehnikasy jáne 19 motopompamen, jergilikti aýyldyq okrýgtiń 46 qyzmetkeri 31 tehnikasymen, 6506 áskeri bóliminiń 100 qyzmetkeri 4 tehnikasymen jumyldyryldy. Qazirgi tańda jaǵdai turaqty baqylaýda. Aýla ýchaskelerinen sýdy sorý jumystary júrgizilýde», delingen habarlamada.
Aita keteiik, keshe saǵat 19.14-te Eńbekshi aýdany, Eltai eldi mekenine Túrkistan oblysynyń Tólebi aýdanynan sekýndyna 3-5 tekshe metr sý kelgen. Sýdyń deńgeii 20-50 sm quraǵan. Kóp mólsherde kelgen sýdan aryq arnasynan asyp, sonyń saldarynan turǵyn úilerdiń aýlalaryn sý basqan.
