Shymkent qalasy men Túrkistan oblysynda sý basqan úiler men aýlalar joq. Bul týraly QR IIM Tótenshe jaǵdailar komitetinen málim etti, dep habarlaidy "Ult aqparat".
«Qutqarýshylardyń, jergilikti atqarýshy organdardyń sý sorý, aryqtardy tazartý jáne tereńdetý jumystarynyń arqasynda Shymkentte jáne Túrkistan oblysynyń Tóle bi, Qazyǵurt, Báidibek, Sairam, Túlkibas aýdandarynda sý basqan úiler men aýlalar joq. Sonymen qatar Badam men Keles ózderiniń jaǵalaýlaryn nyǵaitý jumystary júrgizildi. Evakýatsiialanǵan adamdar úilerine oraldy», - delingen komitet aqparatynda.
Vedomstvo málimetinshe, qutqarýshylardyń, jergilikti atqarýshy organdardyń kúshimen Shymkent qalasynda 9 myń tekshe metr sý soryldy. Jaǵalaýlardy nyǵaitý jumystary barysynda 750 myń tonna inertti material qoldanylyp, politsiia qoǵamdyq tártipti qorǵaýdy qamtamasyz etti.
Apattyq qutqarý jumystaryna Shymkent qalalyq TJD jeke quramynyń 168 mamany, 19 tehnikasy, 21 motopompasy, jergilikti atqarýshy organdardyń 74 qyzmetkeri, 55 tehnikasy, QR Ulttyq ulanynyń 100 áskeri qyzmetshisi men 4 tehnikasy jumyldyryldy.
Al Túrkistan oblysynyń joǵaryda atalǵan aýdandarynda 2 myń tekshe metr sý sorylyp, jaǵalaýlardy nyǵaitý jumystaryna 1 200 tonna inertti material paidalanyldy. Tótenshe jaǵdai saldaryn joiý jumystaryna oblystyq TJD jeke quramynyń 52 mamany, 15 tehnikasy, 15 motopompasy, jergilikti atqarýshy organdardyń 241 qyzmetkeri men 33 tehnikasy tartyldy.
«Tótenshe jaǵdai ornynda zardap shekken halyqqa kómek kórsetý jáne keltirilgen shyǵyndy baǵalaý úshin komissiia jumys istep jatyr», - dep atap ótedi vedomstvodan.
