Keshe Shymkent mańynda jantúrshigerlik jol apaty bolyp, belgili volonter qaitys boldy, - dep habarlaidy Tengrinews.kz tilshisi "Astana" telearnasyna silteme jasap.
Almaty-Shymkent tasjolynda joǵary jyldamdyqpen kele jatqan jolaýshylar mingen miniven júk kóligimen soqtyǵysqan. Toyota Alphard júrgizýshisi Shymkentke jaqyndai bergende jol apatyna ushyraǵan. Aldyn ala boljam boiynsha, júrgizýshi qashyqtyqty saqtamaǵan.
Jolaýshylardyń biri jedel járdem kóliginiń ishinde jan tapsyrǵan, taǵy altaýy aýdandyq aýrýhanaǵa jetkizilgen. Dárigerlerdiń aitýynsha, eki adam jansaqtaý bólimine jatqyzylǵan. Bireýi alǵashqy meditsinalyq kómekten soń úiine jiberilgen. Al kólik júrgizýshisi jeńil jaraqattanǵan, tek qatty eseńgirep qalǵan kórinedi. Jol apatynyń sebebin qazir politsiia anyqtap jatyr.
Belgili bolǵandai, qaitys bolǵan áiel Almatyda belgili volonter, janýarlar quqyǵyn qorǵaýshy Gaýhar Serik ekeni anyqtaldy. Bul týraly eriktiler qozǵalysynyń ókilderi áleýmettik jelidegi paraqshalarynda jariialady.
"Búgin qaiǵyly oqiǵa oryn aldy. hvostiki_i_my paraqshasynyń volontery Gaýhar qaitys boldy. Jas, sulý qyz, aiaýly ana, júregi keń, jany meiirimdi Gaýhar úsh jasar kishkentai ulyn qaldyryp ketti.
Gaýhar kóp janýardyń ómirin saqtap qalǵan tamasha adam. Onyń arqasynda júzdegen janýar ómir súrip jatyr. Otbasy men jaqyndaryna qaiǵyryp kóńil aitamyz. Biz sizdermen birge qaiǵyramyz", - delingen habarlamada.
