Qys bastalǵanda gúl egip júrgen shymkenttikter kópshilikti tań qaldyrdy, - dep habarlaidy Kazinform agenttigi.
Áleýmettik jelide kóshedegi gúlzarǵa gúl egip júrgen jumysshylardyń videosy tarady. Video avtorynyń aitýynsha oqiǵa Shymkent qalasynda túsirilgen.
«Bul - Shymkent. 1-shi jeltoqsan kúni gúl egip jatyr. Qastarynda gúl toly úlken kólik tur. Bularda kóktem kelgeni jaiynda arnaiy habar bar nemese qalaǵa qurmetti qonaq kele jatyr. Soǵan qalany sándeýde», - deidi avtor.
Al, «ShymkentSpetsKompleks» JShS mamandary qazirgi ýaqytta qala gúlzarlaryna «Viola» sortty gúl egilip jatqanyn málimdedi.
«Viola» gúli tómen temperatýraǵa shydamdy keledi. Sondai-aq, ol kópjyldyq ósimdik, aiazǵa da tózimdiligi joǵary. Aýa raiynyń qolaisyzdyǵyna bailanysty sándik kórkin joǵaltpaidy», - delingen «ShymkentSpetsKompleks» JShS usynǵan aqparatta.
Al, jelidegi videoǵa pikir jazýshylar ekige bólingen. Biri tańǵalsa, endi biri qysta gúl ekken shymkenttikterdi synap jatyr.
