Búgin aqparattyq-kommýnikatsiialar ortalyǵynda qaladaǵy epidemiologiialyq jaǵdaiǵa bailanysty brifing ótti.
Onda Shymkent qalasynyń ákimi Murat Áitenov, qalalyq Densaýlyq saqtaý basqarmasy basshysy Rýstam Albaev, qalalyq Jedel járdem kórsetý stantsiiasy bas dárigeriniń orynbasary Sholpan Ospanova jáne jedel járdem dárigeri Arman Hamzin qatysty, dep habarlaidy QazAqparat.
Brifingte sóz alǵan qala ákimi Murat Dúisenbekuly qaladaǵy epidemiologiialyq jaǵdai jáne ony qalypqa keltirý barysyndaǵy jumystar jóninde aitty.
«Respýblikalyq deńgeide Shymkent qalasy boiynsha túrli jańalyqtar tarap jatyr. Iaǵni, Qaznette Shymkent qalasynda «naýqastar aýrýhana qaqpasyna jetpei qaitys bolyp jatyr jáne naýqastarǵa oryn joq» degen sekildi aqparattar taraýda. Osy máseleni túsindirip bersem, búginde qalada 650 infektsiialyq tósek-oryn bar. Onyń ishinde juqpaly aýrýhanalarda -350, jańa salynǵan gospitalda 200 jáne Atameken provizorly statsionarynda 100 oryn bar. Atalǵan eski juqpaly aýrýhanalar aýrýhanasynda 321 naýqas jatyr, gospitalda 172 jáne Atameken provizorly statsionarynda 42 naýqas emdelýde. Al jalpy 115 oryn bos. Odan bólek, qalada 1690 provizorly oryn bar. Onyń ishinde 1315-inde naýqastar em alýda, qalǵany bos. Iaǵni, provizorly oryndardyń 77%-y paiyzy tolyp tur. Sol sebepti búgin 500 provizorly oryn ashamyz. Al jeksenbi kúni -200, dúisenbi kúni 500 provizorly oryn ashylady. Sondai-aq, 51 mekemede 628 tósek-oryndyq kúndizgi statsionar ashtyq. Onyń 248-i bos. Atalǵan kúndizgi statsionardaǵy bir oryn kúnine 5 adamdy qabyldai alady. Al jumys ýaqyty tańǵy 08:00-den keshki 20:00-ge deiin (demalyssyz) isteidi.
Aita keteiin, osy kúndizgi statsionarlarda naýqastar tirkelgen emhanasy boiynsha tegin emdeledi. Halyqqa der kezinde meditsinalyq kómek kórsetý úshin emhanalardyń jumysyn eki ese kúsheitemiz», – dedi qala ákimi.
Atalǵan brifingte Shymkent qalalyq Densaýlyq saqtaý basqarmasynyń basshysy Rýstam Albaev ta koronavirýs infektsiiasyn juqtyrǵan 2084 naýqas tirkelgenin atap ótti.
«Onyń 45 paiyzy – simptomsyz. Provizorly statsionarlardyń tósek qory 89 paiyzǵa júktelgen. Al dári-dármektiń eki ailyq qory bar», - dedi basqarma basshysy.
Brifing sońynda sóz alǵan qala basshysy Murat Dúisenbekuly qazirgi kezde meditsina mamandaryna júktelgen mindettiń aýyr ekendigin alǵa tartyp, tynymsyz eńbek etip jatqan mamandardyń jumysyna túsinistikpen qaraýǵa shaqyrdy. Eń bastysy, qolaisyz epidemiologiialyq jaǵdaiǵa bailanysty turǵyndarǵa saqtyq sharalaryn qatań ustaný qajet ekendigin eskertti.
Aita keteiik, kúni keshe áleýmettik jelilerde Shymkenttegi naýqastardyń kóptiginen aýrýhanalarda oryn jetpei jatyr degen maǵynada aqparattar taraǵan bolatyn. Jedel járdem qyzmetiniń bir dárigeri aýyr jaǵdaida jatqan naýqasty aýrýhanalar qabyldamai jatqanyn aitqan edi.
