Shymkent qalasynyń ákimi Nurlan Saýranbaev búgin oblys jáne qalalyq buqaralyq aqparat quraldarynyń jetekshilerimen, respýblikalyq BAQ menshikti tilshilerimen kezdesti, dep habarlaidy "Ult aqparat".
Kezdesý barysynda Nurlan Ermekuly qala ákimdiginiń jumysy aldaǵy ýaqytta qalai júzege asyrylatynyn, basa mán beriletin negizgi baǵyttar týraly áńgimeledi.
Eń bastysy – bul qala turǵyndary. Ákimdiktiń jumysy turǵyndardyń ómir súrý jaǵdaiyn jaqsartatyn áleýmettik jáne ekonomikalyq máselelerdi sheshýge baǵyttalady.
Negizgi baǵyttar:
- kólik (joldar, qoǵamdyq kólik jáne t.b.);
- turǵyn úi-kommýnaldy sharýashylyq (kommýnaldy qyzmetpen qamtamasyz etý);
- áleýmettik nysandar (balabaqshalar, mektepter, kitaphanalar men aýrýhanalardy soǵý);
- qaýipsizdik;
- halyqty jumyspen qamtý.
Qala ákimi jańasha órbitin jumys týraly da aitty: «Meniń aldymdaǵy ákim Ǵabidolla Ábdirahymov halyqpen keri bailanysýda úlken jumysty bastap ketti. Bul jumys jalǵasady jáne burynǵydan da kúsheitiledi. Naqty aitsaq, endi ákimdiktiń aqparat habarlamalaryn taratatyn resmi ókili bar. Ol ákimniń, ákim orynbasarlary men bólim basshylarynyń jumysy týraly suraqtarǵa jaýap beredi nemese qajet spikerdi daiyndaidy. Buǵan qosa youtube jelisinde ákimdiktiń jumysyn jariialaityn óz kanaly bolady. Buǵan qosa qosymsha aqparat kózderi – áleýmettik jeliler men sait ta bar.
Shahar basshysy jýrnalisterdiń syni maqalalary jumysqa óz kómegin tigizetinin atap ótti: «Men sizderdiń kez kelgen ákimge berilgen biýdjet shekteýli ekenin túsingenderińizdi qalaimyn. Mysaly, shaharda 3000 shaqyrymnan astam kólik joly bar. Asfalt solardyń jartysyna ǵana tóselgen. Árine, qalanyń damý biýdjetin jol salýǵa jumsai alar edik, biraq, onda biz birde-bir balabaqsha nemese mektep sala almaimyz, basqa mańyzdy baǵyttaǵy jumys ta turalap qalar edi. Barlyq nársege qarjy jetpeitinin anyq túsinip, mańyzdy baǵyttardy naqtylap alýymyz kerek».
Kezdesý sońy birtindep erkin áńgimelesýge ulasty.
Osy tusta Nurlan Ermekuly kópshilikten Shymkenttiń 2030 jyly qandai qala bolatyny týraly boljamdaryn surady. Jaýap retinde túrli nusqalar aityldy – janǵa jaily qala, mádenietti qala, jastarǵa, týristerge arnalǵan qala...
«Janǵa jaily qala ataýy kez kelgen shaharǵa qatysty qoldanylatyny belgili. Biraq, Shymkent qandai bolýy tiis? Qalamyz ózine ǵana tán sipatynda bolýy tiis. Sizder jastarǵa arnalǵan dedińizder, ol da múmkin. Týristik qala – bul da durys, degenmen, ol úshin týristerge qajet jaǵdaidyń barlyǵyn jasaýymyz kerek».
Nurlan Ermekuly Shymkenttiń aldaǵy ýaqytta damýy týraly suraqqa da jaýap berdi:
«Jaqyn bolashaqta bizdiń negizgi 3 nysanymyz bolatynyn aita alamyn. Olar: Shymkent-siti, áýejai jáne tsitadel – úlken tarihi eskertkish. Atqarylar jumystan eń aldymen kógaldy aimaqtar qurylady, iaǵni, gúlzarlar men saiabaqtar. Jáne «Aqyldy qala» jobasy da umyt qalmaidy. Bul – aýqymdy joba, bul – bolashaq».
Kezdesý erkin ótti. Jinalǵandardyń árqaisysy bolashaqtaǵy jumys týraly óz pikirin erkin bildirip, kókeilerindegi mazalap júrgen suraqtaryn da qoidy. Sońynda barlyǵy da Shymkenttiń jarqyn bolashaǵy úshin ákimdik pen buqaralyq aqparat quraldarynyń jumyla jumys isteýi mańyzdy degen pikirge keldi.
