Shymkent qalasynyń ákimi Murat Áitenov qalada koronavirýstyń taǵy da taralý qaýpine daiyndyq jumystary qalai júrgizilip jatqanyn aityp berdi, dep habarlaidy QazAqparat.
«Qaladaǵy epidemilogiialyq ahýalǵa toqtalar bolsam, osy jyldyń 24 naýryzynan 16 qarashaǵa deiingi aralyqta COVID-19 aýrýyn 5 292 adam juqtyrdy. Koronavirýstyń yqtimal tolqynyna úsh stsenarii boiynsha daiyndaldyq. A, V, S jospary boiynsha 5 416 tósek ornyna deiin ázirleýge múmkindik bar. Qalada jalpy qýattylyǵy kúnine 3550 testke jetetin 9 PTR zerthana bar. Jańadan 100 jedel járdem avtokóligi alynyp, avtopark tolyǵymen jańartyldy. Jańa call-center iske qosyldy. Qońyraý qabyldaý qýattylyǵy táýligine 3 500-ge jetti», - deidi Murat Áitenov.
Shymkent qalasynyń ákimi sonymen qatar, biyl 6,4 mlrd teńgege 7 meditsina mekemeniń ǵimaratyna kúrdeli jóndeý jumystary júrgizilgenin aitady. Al materialdyq-tehnikalyq jabdyqtaýǵa 6 mlrd 600 mln teńge bólý kózdelgen. Búgingi tańda qalada 19 kompiýterlik tomografiia apparattary jumys istep tur.
«Jyl basynda qalada ókpeni jasandy jeldetýdiń 310 apparaty bolsa, qazir olardyń sany 612-ge jetti. 3 ottegi stantsiiasy ornatyldy. Budan bólek suiyq ottegige arnalǵan 9 rezervýar ornatý jumystary júrgizilýde. Meditsinalyq uiymdarda COVID-19 indetine qarsy eki ailyq dárilik zattar jáne meditsinalyq buiymdar qory qalyptasty, qorǵa 659 mln teńge bólindi. Qaladaǵy dárihanalar monitoring jasalýda. Búgingi kúni qalanyń dárihanalarynda koronavirýsty emdeýge qajet 1,7 mlrd.teńge kóleminde dári-dármek qory bar», - deidi ol.
Murat Áitenov tótenshe jaǵdai kezenińde tabysynan aiyrylǵan azamattarǵa «Memlekettik áleýmettik saqtandyrý qory» esebinen áleýmettik tólem berý jumystary júrgizilgenin aitady. Osylaisha birińshi kezeńde 285 551 adamǵa 19,9 mlrd teńge, ekinshi kezeńde 143 519 adamǵa 6,1 mlrd teńge kóleminde áleýmettik tólem berilgen. 41 myńnan astam az qamtamasyz etilgen otbasyǵa «Biz birgemiz» qoǵamdyq qorynan 50 myń teńgeden, 17 myńnan astam azamattardyń kommýnaldyq shyǵystary memlekettik biýdjetten ótelgen.
