«Nur Otan» partiiasy Tóraǵasynyń Birinshi orynbasary arnaiy saparmen Singapýrde boldy. Onda qazaqstandyq partiia ókilderi birqatar kezdesýler ótkizip, kelissózder júrgizdi, dep habarlaidy "Ult aqparat".
Atap aitqanda, Muhtar Qul-Muhammed Halyqtyq is-áreket partiiasynyń Bas hatshysy, Singapýrdiń Premer-ministri Li Sian Lýnmen, osy partiianyń tóraǵasy Kho Býn Vanmen, Parlament spikeri Halima Iakýbpen jáne Li Kýan Iu atyndaǵy Memlekettik saiasat mektebiniń rektory Kishore Mahbýbanimen kezdesti. Sondai-aq, nurotandyq delegatsiia Nanian tehnologiialyq ýniversitetiniń robottar jasaityn ǵylymi-zertteý ortalyǵynda bolyp, jumysymen tanysty.
Muhtar Qul-Muhammed eki el arasyndaǵy yntymaqtastyqtyń nyǵaiýynda Qazaqstan Prezidenti Nursultan Nazarbaev pen Singapýr premer-ministri Li Kýan Iýdiń roli erekshe ekenin aityp: «Singapýr memleketiniń negizin salýshy Li Kýan Iu birneshe ret Qazaqstanda bolyp, bizdiń Elbasymyz týraly óte joǵary pikirde boldy. Mundai úrdis saiasatkerlerdiń búgingi býynynan da baiqalady. Bul eldiń tabysyn Batystyń eń damyǵan elderi áldeqashan moiyndap, búginde Singapýrden úirenýde. Eldegi saiasi turaqtylyq pen ekonomikalyq reformanyń tabysty júrgizilýine Halyqtyq is-áreket partiiasynyń qosqan úlesi zor. Biz Batysqa qarap bas shulǵi bermei osyndai aziialyq, shyǵystyq dástúrdegi partiialardan da úirenýimiz kerek. Sol úshin «Nur Otan» singapýrlyq áriptesterimen jan-jaqty qarym-qatynas ornatýdy bastap ketti», – dedi.
Batys AQSh-qa qarap bas shulǵidy, al Tramp kelgeli onyń jaǵdaiy ne bolǵanyn bárimiz kórip otyrmyz. Sondyqtan kezinde Alash arystary úlgi etken keshegi Japoniia, búgingi Singapýr siiaqty óren júirik memleketterden úirengenimiz jón. Óz bylyǵyna belshesinen batqan Resei emes, Maǵjan aitqan Kúnshyǵysqa qarai bet burýymyz kerek.
