Foto: © Shyǵys Qazaqstan oblysy tótenshe jaǵdailar departamenti
Shyǵys Qazaqstan oblysynyń Kúrshim aýdanynda tótenshe jaǵdai jariialandy.
Aýdandaǵy aýyldardyń 1200-den astam turǵyny qar qursaýynda qaldy. Turǵyndarǵa azyq-túlik pen dári-dármek tikushaqpen jetkizildi, dep habarlaidy Sputnik Qazaqstan oblystyq ákimdiktiń baspasóz qyzmetine silteme jasap.
7 qańtardan beri Kúrshim aýdanynda qar men boran údep tur. Keibir jerlerde qardyń qalyńdyǵy 2 metrge jetti. Marqakól jáne Tósqaiyń aýyldyq okrýgteriniń eldi mekenderi kólik qatynasynan ajyrap qaldy.
"Qardyń shamadan kóp jaýyp, boran bolǵandyqtan eldi mekenderge kólik qatynasy toqtap qaldy. Kúrshim aýdanynyń ákimdigi jergilikti aýqymdaǵy tabiǵi sipattaǵy tótenshe jaǵdai jariialady", - dep jazdy vedomstvo.
Aýdandaǵy 9 aýylǵa bir aptadan beri kólik qatynai almai qaldy. Shanaqatty aýylynda elektr jaryǵy óship qalǵan.
Foto: © Shyǵys Qazaeqstan oblysy tótenshe jaǵdailar departamenti
"Joldy ashýǵa qosymsha tehnika jóneltildi. Qazirgi ýaqytta arnaiy tehnikanyń 24 birligi jumyldyrylǵan. Alaida boranǵa bailanysty jumys isteý qiyndap tur. Kúrshim aýdanyna qajetti kómek kórsetý úshin ShQO boiynsha TJ departamentiniń joǵary ótpeli tehnikasy keldi", - deidi oblystyq ákimdiktiń baspasóz qyzmeti.
Jergilikti biliktiń aitýynsha, qar sýly, bul tazartý jumystaryn qiyndatyp tur. Marqakól jáne Tósqaiyń aýyldyq okrýgteri mektepteriniń oqýshylary 8 qańtardan bastap qashyqtan oqyp jatyr.
