Shyǵys Qazaqstan oblysyndaǵy iri kásiporyndar sanitarlyq baqylaýdy kúsheitip, jumysyn jalǵastyrýda, dep habarlaidy "Ult aqparat".
ShQO kásipkerler palatasy direktorynyń orynbasary Qairat Mamyrbaevtyń aitýynsha, TJ jariialanǵan birinshi kúnnen bastap jeke kásipkerlerge elimizde daǵdarystyń aldyn alý jumystarynyń qalai júrgizilip jatqany túsindirilýde. Búginde birqatar sharalar qabyldanyp, sonyń aiasynda týrizm, qonaqúi qyzmeti men qoǵamdyq tamaqtaný oryndarynyń ieleri salyqtan bosatylǵan. 1 maýsymnan bastap shaǵyn jáne orta biznes ókilderi salyq tólemeitin bolady. Sondai-aq barlyq biznes sýbektileri úsh ai boiy nesieni tóleýdi keiingi shegere alady. Óńirdegi kásiporyndardyń kóbisi jumysyn toqtatpady. Olar qyzmetkerleriniń biraz bóligin qashyqtan jumys isteýge kóshirgen.
«Silýmin-Vostok» JShS tótenshe jaǵdaiǵa bailanysty birde-bir qyzmetkerdi aqysyz eńbek demalysyna jibermegen jáne eshkimdi jumystan bosatpaǵan.
«Kásiporynda koronavirýs infektsiiasynyń aldyn alý maqsatynda sanitarlyq baqylaý kúsheitildi. Kompaniia 100 paiyz qajetti quraldarmen jabdyqtalǵan. Biz mashina qurastyrý jumysyn toqtata almaimyz. Óitkeni osy kásiporynda shyǵarylatyn tehnika kommýnaldyq qyzmet úshin aýadai qajet, - deidi «Silýmin-Vostok» JShS direktory Zoia Novolodskaia.
Óndiristik qýatty azaitqan kásiporyndar da bar. Solardyń biri - «ÝK Tripleks». Atalmysh kompaniia shyny shyǵarýymen ainalysady. Búginde bul kásiporyn qyzmetkerleriniń 30 paiyzy ǵana jumys isteýde. Qalǵan 70 paiyzy aqyly eńbek demalysyna jiberilgen.
«Elimizde jariialanǵan tótenshe jaǵdaiǵa bailanysty kásiporyn qyzmetkerleri qysqartylǵan rejimde júmys isteýge kóshti. Jumysshylardyń deni aqyly eńbek demalysyna shyqty. Al qalǵandary qyzmettik kólikpen jumysqa jetkizilýde. Osyndai qiyn kezeńde bizge kómek kórsetip, nesieniń tóleý merzimin 90 kúnge deiin shegergeni úshin Úkimetke alǵys aitamyn. Karantin aiaqtalǵan soń bizdiń kásiporyn tolyq kúsh-qýatpen jumysqa kirisedi, - deidi «ÝK Tripleks» JShS direktory Konstantin Borodastov.
