Shyǵys Qazaqstan oblysy Zaisan aýdanynyń aýmaǵynan orta ǵasyrlyq qalashyqtyń orny tabyldy. Bul jaily belgili arheolog Ábdesh Tóleýbai málimdedi, dep jazady QazAqparat.
Arheologtyń aitýynsha, kóne shahardyń orny Qaratal aýylyna qarasty Jińishke ózeniniń boiy men Sarjyra aýylynyń mańynan tabyldy. Alaida onyń naqty qai kezeńge jatatynyn dóp basyp aitýǵa erte.
«Orta ǵasyrlyq qalashyq 5 ǵasyr men 12 ǵasyrǵa deiingi aralyqqa tiesili bolýy múmkin. Osy Zaisan aýdanyndaǵy Sarjyra degen jerden de qalashyq tabylǵan. Ekeýiniń aralyǵy - shamamen 25-30 shaqyrym. Qalashyqtardan qysh qumyra synyqtary, qurylysqa paidalanǵan shaqpaq tastar, mys ydystardyń synyqtary, mys pyshaq, tastan oiylyp sheber jasalǵan áshekei buiymnyń qaldyqtary tabyldy. Buny áigili Jibek jolynyń kishigirim bir tarmaǵy dese de bolady. Negizgi jol Jońǵar qaqpasyna qarai ketedi. Iaǵni, Jetisýdan bastalady. Ekinshi bir tarmaǵy Tarbaǵataidy bókterlep, Aqsýat, odan ary Zaisan, odan Jemenei, qara Ertistiń boiymen Qytaiǵa qarai ótken. Osy jolda qala jurttary, qonys oryndary tabylyp jatyr», - deidi Ábdesh Tóleýbai.
Onyń sózinshe, endi qazba jumystary júrgiziledi. Qalashyqtyń naqty kezeńi sol kezde belgili bolmaq.
Aita keteiik, arheolog Ábdesh Tóleýbai Zaisan aýdany Shilikti aýylynan úshinshi «Altyn adamdy» tapqan.
