Shyǵys Qazaqstan oblysy Glýbokoe aýdanyndaǵy demalys bazasynda shyqqan iri órt sóndirildi, dep habarlaidy QazAqparat.
ShQO Tótenshe jaǵdailar departamenti baspasóz qyzmetiniń málimetine súiensek, búgin tańǵy saǵat 07.00 shamasynda Glýbokoe aýdanyndaǵy demalys bazalarynyń birinde órt shyqqan.
Belgili bolǵandai, taý shańǵysy jabdyqtaryn jalǵa beretin ǵimarattyń aǵash qurylymdary otqa orandy.
«Oqiǵa ornyna órt sóndirýshiler shuǵyl kelip jetti. Qutqarýshylar tilsiz jaýdyń kórshiles ornalasqan basqa nysandarǵa taralýyna jol bermedi. Kóp uzamai jalpy aýdany 140 sharshy metrge jetken qyzyl jalyn tolyqtai aýyzdyqtaldy. Zardap shekken eshkim joq», - delingen aqparatta.
Órtti sóndirýge jeke quramnan 16 adam men 4 tehnika jumyldyryldy.
Ottyń shyǵý sebebi – elektr jabdyqtaryn montajdaý jáne paidalaný kezinde órt qaýipsizdigi talaptaryn saqtamaýdan bolýy múmkin.
