Shyǵys Qazaqstan oblysynda jyl basynan beri 200-den astam kásiporyn bankrotqa ushyrady, dep habarlaidy QazAqparat.
Osy jyldyń toǵyz aiynda óńir boiynsha 208 kásiporyn taratyldy. Onyń basym bóligi - saýda salasynan.
ShQO memlekettik kirister departamenti basshysynyń orynbasary Erik Tatýbaevtyń aitýynsha, bul ótken jylmen salystyrǵanda 4 ese kóp.
«2019 jyly «Ońaltý jáne bankrottyq týraly« QR Zańyna tolyqtyrýlar men ózgerister engizilgen. Oǵan sáikes boryshkerdiń bankrottyq rásimin qozǵai otyryp, kásiporyndy bankrot dep taný jáne taratý týraly ótinish berýge – onyń turaqty tólem qabiletsizdigi negiz bola alady. Kreditordyń boryshkerdi bankrot dep taný týraly sotqa ótinish berýi úshin zańdy kúshine engen sot aktisi negiz bola alady», - dedi ol.
Buryn ótinishti qaraý merzimi bir aidy qurasa, endi jańa ózgeristerge bailanysty eki aiǵa sozylady.
«Osy rette sottyń boryshkerdi bankrot dep tanýdan bas tartýy ony bankrot dep taný týraly ótinishti qaita berý quqyǵynan aiyrmaidy. Al ońaltý rásimin qoldanýdan bas tartylǵan jaǵdaida boryshker ótinishti eki jyl ótkennen keiin ǵana qaita bere alady», - dep túsindirdi Erik Tatýbaev.
