Shyǵys Qazaqstan oblysynda karantin sharalary 1 shildege deiin sozyldy, dep habarlandy ShQO bas sanitar dárigeriniń qaýlysynda.
Qujatqa sáikes, Shyǵys Qazaqstan oblysynyń barlyq aýmaǵynda 2020 jylǵy 1 shilde saǵat 00.00-ge deiin shekteýler, sonyń ishinde karantin sharalary saqtalady. Sharýashylyq jáne ózge de qyzmet túrlerine qatysty airyqsha jaǵdai engiziledi.
Sońǵy 7 kún ishinde ósim 4,7% quraǵan Semeige erekshe kóńil bólindi. Qaýlyda qalada azyq-túlik satpaityn saýda nysandarynyń jumys ýaqytyn saǵat 10.00-den 17.00-ge deiin jáne azyq-túlik satatyn saýda obektileriniń jumys ýaqytyn saǵat 08.00-den 20.00-ge deiin qysqartý qajettigi týraly aitylǵan.
Bul rette shekteýler azyq-túlik emes taýarlardy kóterme-bólshek jáne bólshek saýdamen satatyn saýda nysandaryna, iri saýda obektileri men keshenderine, saýda-oiyn-saýyq ortalyqtaryna, aýmaǵy 2000 sharshy metrden asatyn saýda úilerine tyiym salynady. Sondai-aq, túngi klýbtardyń (diskotekalardyń), barlardyń, kaliandar men karaoke jumysyna ruqsat etilmeidi.
Sonymen qatar, qujatta Semei qalasynda, dálirek aitqanda, aýrý juqtyrý deńgeii joǵary qala aýdandarynda, sondai-aq adamdar kóp jinalatyn jerlerde, turǵyn úi sektorynda, saiajai aýmaǵynda, saiabaqtarda, gúlzarlarda, aýla ishindegi balalar oinaityn alańdar men sport alańdarynda, rekreatsiia aimaqtarynda, qoǵamdyq kólikterde maskalyq rejim men áleýmettik qashyqtyqty saqtaý turǵysynan patrýldeý kúsheitiletini habarlandy.
Oblystyń bas sanitar dárigeriniń qaýlysynda Úrjar aýdanynda, atap aitqanda Alakól kóliniń jaǵalaýynda da sanitarlyq normalardy saqtaý kerektigi aitylady.
