Foto: Shyǵys Qazaqstan ákimdigi
Shyǵys Qazaqstandaǵy Katonqaraǵai aýdanyna qarasty 17 aýyldyń turǵyndary óz ýaqyt beldeýine kóship, jańa keste boiynsha jumys istep jatyr, dep habarlaidy Ult.kz Stan.kz-ke silteme jasap.
Jergilikti ákimdiktiń málimetinshe, 2025 jyldyń 5 qańtarynan bastap Qatonqaraǵai aýdanynda bes kúndik jumys aptasy engizilip, jumys ýaqyty saǵat 08:00-den 17:30-ǵa deiin jalǵasady. Saǵat 12:00-den 13:30 túski úzilis ýaqyty bolyp belgilendi.
Qatonqaraǵai aýdany ákimdiginiń ishki saiasat bóliminiń basshysy Gúlnár Jaqsylyqova ótken jyldyń sońynda aýdanǵa jumys toby kelip, ýaqyt beldeýi máselesin talqylaǵanyn aitty. Turǵyndarmen kezdesý barysynda pilottyq jobany iske qosyp, jumys kúnin saǵat 08:00-den bastaý týraly sheshim qabyldandy.
“Qatonqaraǵaida tań erte atady, biz shyǵystamyz, saǵat beste jaryq bolyp turady. Aýylda adamdar da erte turady. Sondyqtan kópshilik birden kelisti. Aýdan ákiminiń ókimimen 5 qańtardan bastap tańǵy segizden bastap jumys isteimiz”, – dedi Gúlnár Jaqsylyqova.
Ákimdiktiń málimetinshe, aýdandaǵy 40 mekemeniń barlyǵy jańa jumys kestesine kóshti. Degenmen kóbine beiimdelýdiń de qajeti bolmady. Óitkeni mektepter, balabaqshalar men aýrýhanalar onsyz da tańǵy saǵat 08:00-den bastap jumys isteitin kórinedi.
“Bul óte yńǵaily. Buǵan deiin balalardy saǵat 08:00-de aparatynbyz, sosyn 09:00-de ǵana jumysqa kirisetinbiz. Al qazir jumysqa bara jatqanda balany balabaqshaǵa aparyp, erterek bosap, úige kelip, biraz sharýany bitirip úlgerýge bolady. Bul bizge qolaily. Burynǵy kestege oralǵymyz kelmeidi”, – deidi ishki saiasat bóliminiń basshysy.
Jergilikti turǵyndardyń bul sheshimin kásipkerler de qoldaǵan.
“Biz týristik aimaqpyz, kóp adamdar azyq-túlik dúkenine tańnan keledi, al biz ol kezde ashyq bolamyz. Bul barlyǵyna yńǵaily”, – deidi kásip ieleri.
Resmi málimetterge sensek, pilottyq joba Katonqaraǵai aýdanynyń Qabyrǵa, Belqaraǵai, Órnek, Topqaiyń, Barlyq, Korobiha jáne Aqsý, Órel, Arshaty, Berel, Jambyl, Qaiyńdy, Qyzyl Juldyz, Aqqainar, Eńbek, Shyńǵystai, Jańaúlgi aýyldarynda engizildi.
