Shvetsiia prokýratýrasy "zorlaý" baby boiynsha aiyptalǵan Ýikiliks (WikiLeaks) jobasynyń negizin qalaýshy Djýlian Assanjdyń ústinen qozǵalǵan qylmystyq isti toqtatty.
Prokýratýra ókiliniń aitýynsha, Assanjdyń kináli ekenin dáleldeitin aiǵaq jetkiliksiz bolǵandyqtan is sotqa jiberilmegen. Alaida prokýratýra bul sheshimdi apelliatsiiaǵa berýge bolatynyn aitty.
Shvetsiia 2010 jyly Assanjǵa "zorlaý" baby boiynsha aiyp taqqan. Ýikiliks jobasynyń avtory taǵylǵan aiypty joqqa shyǵarǵan. Shvetsiia Ulybritaniiadan Assanjdy ekstraditsiialaýdy talap etip, aqyrynda Ýikiliks jetekshisi Londondaǵy Ekvador elshiligin panalaýǵa májbúr bolǵan. Ekvador biligi oǵan saiasi baspana berdi.
Elshilik ǵimaratynda jeti jylǵa jýyq ýaqyt turǵan Assanj biyl kóktemde saiasi tutqyn márbesinen airylyp, britan politsiiasynyń qolyna tústi. Ol qazir Ulybritaniiada kepildik shartyn buzǵany úshin túrmede jazasyn ótep jatyr. Ol sonymen birge ózin AQSh-qa ekstraditsiialaý boiynsha sot sheshimin kútip otyr.
"Qupiia aqparattardy jariialaýmen" tanymal bolǵan Ýikiliks jobasynyń avtory Djýlian Assanjǵa AQSh-ta 17 aiyp taǵylǵan. Olardyń arasynda "tyńshylyq" baby da bar. Zańgerler oǵan 175 jyl jaza berilýi múmkin dep boljaidy.
AQSh demokrattarynyń serverinen urlanǵan qujattardy jariialaý isinde de Assanjdyń aty atalady. Buǵan deiin AQSh-tyń arnaiy prokýrory Robert Miýller osy is boiynsha Reseidiń áskeri barlaý qyzmetin aiyptaǵan.
Mamyr aiynyń sońynda BUU-nyń qysymmen kúres jónindegi ókili Nils Meltser Assanjdyń túrmede psihologiialyq qysym kórip otyrǵanyn málimdegen. Meltserdiń aitýynsha, Ýikiliks jetekshisiniń ainaladaǵy adamdardan qatty qaýiptenetini baiqalǵan.
Assanjdy Ekvador elshiliginen shyǵaryp, britan politsiiasy ustaǵannan keiin Shvetsiia onyń ústinen qozǵalǵan qylmystyq isti qaita qolǵa alǵan. Alaida shved soty Londonnan ony ekstraditsiialaýdy suramady.
