Sybailas jemqorlyqqa qarsy is-qimyl agenttiginiń tóraǵasy Alik Shpekbaev pavlodarlyq qoǵam belsendilerimen jáne jýrnalistermen kezdesti, dep habarlaidy "Ult aqparat".
Alik Shpekbaev Pavlodar oblysyna eki kúndik jumys saparymen keldi.
Búgin jurtshylyqpen, biznes-qoǵamdastyqpen jáne BAQ ókilderimen ashyq dialogtyq kezdesý ótti.
Antikor basshysy sybailas jemqorlyqqa qarsy zańnamanyń jańashyldyqtary týraly egjei-tegjeili baiandap, basshylardyń qaramaǵyndaǵy qyzmetkerlerdiń jemqorlyq úshin derbes jaýapkershiligi tájiribesin, jemqorlyqqa qarsy saraptama júrgizýdiń jańa tetigin, ol týraly habardar etýshini yntalandyrý júiesindegi ózgeristerdi, memlekettik qyzmetshilerdiń syilyq alýyna tolyq tyiym salýdy jáne jaqyn týystardyń birlesken jumysyna salynǵan shekteýlerdi atap ótti.
«Sybailas jemqorlyqqa qarsy saiasattyń tiimdi aldyn alý, pármendi qylmystyq-quqyqtyq sharalar, syndarly áriptestik jáne belsendi qoǵam syndy basymdyqtar qazirgi zaman talaptarynan týyndap otyr. Sondyqtan biz qylmystyq-quqyqtyq, jazalaýshy jáne qatań túrde abaqtyǵa qamaý tájiribesinen alshaqtaýdamyz. Qazirgi tańda jemqorlyq quqyq buzýshylyqtardyń aldyn alý negizge alynǵanyn atap ótemin. Bul rette azamattyq qoǵam tarapynan aýqymdy qoldaýdyń mańyzy zor», - dep atap ótti Alik Shpekbaev.
Óz kezeginde pgenttik janyndaǵy aqparattyq-aǵartýshylyq shtab jetekshisi Yrza Tursynzada sybailas jemqorlyq – qoǵamnyń derti, quldyq sananyń jańǵyryǵy ekenin atap ótti.
«Biz azamattardyń sanasyn ózgertip, sybailas jemqorlyqtyń aldyn alý baǵytynda jumys isteýimiz kerek. Árbir sanaly azamat sybailas jemqorlyqqa qarsy kúreske óz úlesin qosýy tiis», - dedi spiker.
Kezdesý barysynda qoǵam qairatkeri Saida Taýkelova Ekibastuz, Aqsý qalalarynda jáne Qalqaman kentinde ótken monitoring nátijelerimen bólisti.
«Sybailas jemqorlyqqa qarsy qyzmet Ekibastuz qalasynyń birqatar meditsinalyq mekemelerine monitoring júrgizdi. Monitoring kezinde as blogyndaǵy sanitarlyq-epidemiologiialyq normalarynyń óreskel buzýshylyqtary anyqtaldy. Sybailas jemqorlyqqa qarsy qyzmet pen qoǵam belsendileriniń áleýmettik mańyzy bar nysandarǵa monitoring jasaýy – osyndai kúrdeli kezeńde asa ózekti», – dep atap ótti ol.
Qoǵam ókilderi sybailas jemqorlyqqa qarsy qyzmet basshysyna tolǵandyratyn suraqtaryn tikelei qoiyp, tolyq jaýap aldy.
Sapar sońynda «Halyq únine qulaq asatyn memleket» tujyrymdamasy aiasynda Alik Shpekbaev oblys ákimi
Ábilqaiyr Sqaqovpen birlesip azamattardy qabyldady.
Máselen, oblys turǵyny eki jasar balaǵa qymbat dári-dármek satyp alý kómegin surady. Atalǵan máseleni sheshý Densaýlyq saqtaý basqarmasynyń basshysyna tapsyryldy.
«Kámeletke tolǵanǵa deiin ata-anasynan aiyrylǵan jetim balalar men ata-anasynyń qamqorlyǵynsyz qalǵan balalar» sanaty boiynsha turǵyn úi alý qiyndyqtary – taǵy bir ótinishke sebep boldy. Bul másele tóraǵanyń jeke baqylaýyna alyndy.
Sonymen qatar, qabyldaý barysynda onkologiialyq naýqastarǵa jáne olardyń otbasylaryna psihologiialyq kómek jáne psihotúzetý qyzmetterin kórsetetin kásipkerlikti damytý jónindegi áleýmettik joba qoldaý tapty.
Kezdesý qorytyndysy boiynsha ýákiletti organdarǵa tiisti tapsyrmalar berilip, olardyń oryndalýy jeke baqylaýǵa alyndy.
