Memlekettik qyzmet isteri jáne sybailas jemqorlyqqa qarsy is-qimyl agenttiginiń tóraǵasy Alik Shpekbaev Agenttiktiń ortalyq apparaty men aýmaqtyq bólimsheleriniń departamentterine resmi feisbýk-paraqsha ashýdy tapsyrdy, dep habarlaidy "Ult aqparat".
«Ótken jyldyń sońynda Feisbýkte paraqsha jáne turǵyndardyń usynystary men shaǵymdary úshin jeke poshta ashtym. Osy ýaqytta áleýmettik jelilerdiń dástúrli BAQ-tan kem túspeitin mańyzdy bailanys quraly ekenin túsindim. Osyǵan bailanysty, Agenttiktiń ortalyq apparaty men aýmaqtyq bólimsheleriniń departament basshylaryna qyzmettik maqsatta resmi feisbýk-paraqsha ashýdy tapsyramyn», - dedi Alik Shpekbaev Agenttiktiń keńeitilgen alqa otyrysynda.
Onyń aitýynsha, áleýmettik jeli turǵyndardyń naqty máselesinen habardar bolyp, jumystyń ashyq bolýyn qamtamasyz etedi.
«Barlyqtaryńyz minsiz imidj bolǵanyn qalaisyzdar, sondyqtan jelide belsendi jumys isteisizder dep úmittenemin. Jańa dáýirdiń jańa talaptary bar jáne jaqyn bolashaqta jumysymyzdyń basym bóligi tsifrlyq keńistikke ótedi. Damyǵan elderdiń kópshiliginde memlekettik organdar áleýmettik jeli arqyly resmi jaýap taratady. Biz de birtindep osyǵan kele jatyrmyz», - dedi Alik Shpekbaev.
