Biznes pen investitsiialardy sybailas jemqorlyq qysymynan jáne ákimshilik kedergilerden qorǵaý – eldiń kún tártibindegi negizgi basymdyqtarynyń biri. Bul týraly QR Sybailas jemqorlyqqa qarsy is-qimyl agenttiginiń tóraǵasy Alik Shpekbaev Facebook-tegi paraqshasynda jazdy, dep habarlaidy "Ult aqparat".
Onyń aitýynsha, 19 tamyzda ótken sybailas jemqorlyqqa qarsy is-qimyl máseleleri jónindegi keńeitilgen keńeste Memleket basshysy osy baǵytty kúsheitýge basa nazar aýdarǵan.
«Bul másele jyl saiynǵy Joldaýda da naqty aiqyndaldy. Shaǵyn jáne orta biznes COVID-19 pandemiiasy jaǵdaiynda qiyn kezeńdi bastan keshýde jáne burynǵydan da zor qoldaýdy qajet etedi. Osy turǵydan alǵanda kásipkerlik qyzmetke zańsyz aralasý «memleketke qarsy eń aýyr qylmys» retinde qarastyrylýy tiis.
Shaǵyn biznes boiynsha halyqaralyq keńestiń (ICSB) derekterine sáikes, ShOB álemdegi barlyq kásiporyndardyń 90%-dan astamyn qurap, shamamen halyqty jalpy 70% jumyspen qamtýdy jáne JIÓ-niń 50%-yn qamtamasyz etedi. Bul turǵyda azamattardyń ál-aýqaty jeke sektordaǵy isterdiń ahýalyna tikelei bailanysty ekenin naqty túsiný qajet.
Bul – salyq túsimderi, jumys oryndaryn qurý, jańa tehnologiialar jáne adam kapitalyn damytý. Bir sózben aitqanda, biznes memleketke halyq aldyndaǵy áleýmettik mindettemelerdi oryndaýǵa kómektesedi. Biz bizneske neǵurlym tiimdi jaǵdai jasasaq, soǵurlym ol ónimdi jumys istep, qoǵamǵa paida ákeledi», - dedi Alik Shpekbaev.
Onyń aitýynsha agenttik sońǵy úsh jylda sheneýnikterdiń zańsyz aralasýynan myńnan astam kásipkerdiń múddesin qylmystyq-quqyqtyq sharamen qorǵaǵan. Bul jumys jalǵasyn tappaq. Sonymen qatar, Sybailas jemqorlyqqa qarsy qyzmettiń árbir ofitserine biznes isine aralasý faktilerine jol bermeý týraly jeke eskertilgen.
«Búgin men keshendi aldyn alý baǵytyna tolyǵyraq toqtalǵym keledi. 2018 jyldan bastap biz Syrtqy ister ministrligimen, «Kazakh Invest «UK» AQ-men jáne «Atameken» UKP-men birlesip «Protecting business and investments» jobasyn iske asyryp kelemiz. Qazirgi ýaqytta oǵan jańa serpin berildi.
Negizgi maqsat – biznes pen investorlardyń qyzmet úderisterin sybailas jemqorlyqqa qarsy súiemeldeý arqyly olardyń memlekettik bilik institýttaryna senimin arttyrý.
Bul kásipkerlerdiń týyndaǵan máselelerin sheshýde quqyqtyq alań aiasynda kómek kórsetýdi bildiredi. Ókinishke orai, olar kóp jaǵdaida biýrokratiialyq kidirister men qaǵazbastylyqty bastan keshire otyryp, «kabinetter aralaýǵa» májbúr. Alaida, olar jalǵyz kúresýge tiisti emes», - dedi Alik Shpekbaev.
Búgingi tańda agenttiktiń aýmaqtyq departamentteri sybailas jemqorlyqqa qarsy súiemeldeýmen jalpy investitsiia somasy 12 trln teńgeden asatyn 500-den astam biznes-joba júzege asyrýda.
«Jobalardyń 20%-y – sheteldik investorlardyń salymy. Olardyń kóbisi Qytai, Resei, Germaniia jáne Túrkiia elderinen. BAÁ, AQSh, Polsha, Niderland jáne basqa da elderdiń biznesmenderiniń qatysýyn atap ótkim keledi. Is júzinde árbir ekinshi joba – óńdeý ónerkásibi salalarynda, árbir besinshi joba – aýyl sharýashylyǵynda iske asýda.
Biz ilespe biznes júginetin problemalyq máselelerdi zerttedik. Olar negizinen investorlyq vizalarǵa, litsenziialarǵa, salyq salýǵa, kedendik bajdarǵa, jospardan tys tekserýlerge jáne jer qatynastaryna qatysty.
Sonymen qatar, biznespen jumys «bir qaqpanyń oiyny» bolmaýy kerek ekenin atap ótemin. Kásipkerlerdiń ózderi memlekettik organdarmen ózara is-qimyl kezinde zańsyz is-áreketterdiń bastamashysy bolatyn jaǵdailar jii kezdesedi», - dedi Alik Shpekbaev.
Onyń aitýyna, agenttiktiń biznes-jobany sybailas jemqorlyqqa qarsy súiemeldeýiniń negizgi sharty – sheteldik, sondai-aq otandyq investor birdei shartta adal biznes júrgizýge mindettenetin kelisimge qosylý.
«Bul baǵytta kásipkerlerdiń sanasyn ózgertý mańyzdy. Isterdi júrgizý kezinde parasattylyq berik standart bolýy kerek. Buǵan halyqaralyq uiymdardyń birqatar usynymdary, atap aitqanda, «Shyǵys Eýropa men Orta Aziiadaǵy biznestiń parasattylyǵy» jáne «Biznesti jaýapty júrgizý» atty EYDU-nyń sybailas jemqorlyqqa qarsy standarttary men zertteýleri dálel bola alady.
Bul úderis kvazimemlekettik sektorda sybailas jemqorlyqqa qarsy komplaens institýtyn tolyqqandy engizýmen aitarlyqtai jandanady. Tiisti zań jobasyn Májilis jáne birinshi oqylymda Senat maquldady.
Eger sizdiń biznes-jobańyz iskerlik parasattylyq qaǵidattaryn saqtai otyryp jumys isteýge daiyn bolsa, biz óz tarapymyzdan sizdi qoldap, sybailas jemqorlyq kórinisteri men ákimshilik tosqaýyldardan qorǵaýǵa daiynbyz», - dedi Alik Shpekbaev.
Agenttik basshysy antikor-súiemeldeýge ótinim berý jáne kelisimge qosylý týraly suraqtar bolsa, +7 (707) 350-63-07 jáne +7 (701) 575-40-37 (WhatsApp) telefondary boiynsha jobalyq keńseniń úilestirýshilerine júginýge bolatynyn jetkizdi. Olar aýmaqtyq departamentteri janyndaǵy «Antikor Ortalyǵy» servistik ortalyǵynda Antikor men óńirlik kásipkerler palatasynyń qyzmetkerlerimen kezdesýdi qamtamasyz etedi.
