Shortandy kentindegi úsh páterli úide gaz ballonynyń jarylýyna órt qaýipsizdigi erejesiniń saqtalmaýy sebep bolǵan. Bul týraly brifingide Aqmola oblystyq TJD bastyǵynyń orynbasary Manarbek Shapaǵatov málim etti, dep habarlaidy QazAqparat.
«Aldyn ala anyqtalǵandai, órttiń shyǵýyna qarapaiym órt qaýipsizdigi, iaǵni gaz qurylǵysyn paidalaný erejesiniń saqtalmaýy sebep bolǵan. Qazirgi kezde saraptama taǵaiyndalyp, zerttelýde. Jarylys saldarynan turǵyn úidiń shatyry men páterlerdi bólip turatyn ishki qabyrǵalar opyrylyp tústi. Gaz ballony jarylǵan páterde bir otbasy turǵan. Sol kúni onda qonaq shaqyrylǵan. Zardap shekkenderdiń barlyǵy sol úidiń turǵyndary emes, arasynda balalarymen birge qonaqqa kelgender de bar. Kórshi páterdegi adamdar zardap shekken joq. Olarǵa tek materialdyq shyǵyn keldi», - dedi Manarbek Shapaǵatov.
Eske sala ketsek, keshe Shortandy kentinde barak tipti úsh páterli úide gaz ballony jaryldy. Oqys oqiǵa týraly habarlama órt sóndirý bólimine saǵat 21:38-de kelip túsken. Órtti sóndirýge TJD-nyń 35 qyzmetkeri men 7 tehnikasy, «Jer Ana» JShS MEÓQQ-nyń 4 qyzmetkeri men 1 tehnikasy jumyldyrylǵan.
Qazirgi málimet boiynsha, úiindiniń astynan úsh adamnyń denesi tabyldy, onyń bireýi kámelettik jasqa tolmaǵan bala. Sonymen birge, túrli deńgeidegi dene kúiigimen 10 adam aýrýhanaǵa jatqyzyldy, onyń ishinde balalar bar. Keibir zardap shekkenderdiń jaǵdaiy aýyr.
