Foto: gov.kz
Jambyl oblysyndaǵy "Shóldala" shekara zastavasynda bolǵan oqiǵadan keiin bes ofitser jumystan qýyldy. Bul týraly UQK shekara qyzmeti kadr, ideologiia jáne tárbie jumysy jónindegi departament basshysynyń orynbasary Erik Berikov málimdedi, dep habarlaidy Sputnik Qazaqstan saity.
2022 jyly tamyz aiynda "Shóldala" shekara zastavasynda 18 jastaǵy sarbaz Bekbol Mirash óz-ózine qol saldy. Bas kezinde ol qyzymen ursysqannan keiin sýitsid jasady degen aqparat taraǵan. Alaida qyzyna jazǵan habarlamalarda qatty qorqyp júrgeni aitylǵan, onymen ursysqany baiqalmaǵan.
"Ókinishke qarai, bizde ondai faktiler boldy. Buǵan deiin áskeri qyzmetshimizdiń ólimin talqyladyq. Árbir oqiǵa boiynsha tyńǵylyqty qyzmettik tergeý júrgiziledi. Al kináli laýazymdy tulǵalar qatań tártiptik jazaǵa tartylady. Sońǵy oqiǵadan keiin bes laýazymdy tulǵa qyzmetinen bosatyldy jáne bireýiniń qyzmeti tómendetildi", – dedi Berikov ortalyq kommýnikatsiialar qyzmetinde ótken brifingte.
Onyń aitýynsha, kóp jaǵdaida otbasylyq-turmystyq problemalar, qaryzdar men lýdomaniia sarbazdardyń óz-ózine qol salýyna sebep bolyp jatady.
"Shekara qyzmetinde álimjettik joq", - dep atap kórsetti Berikov.
Shóldaladaǵy sarbazdyń ólimi
Bekbol Mirashtyń denesi at qoradan tabyldy. Osydan keiin bólim komandiri qamaýǵa alynyp, oǵan qatysty "aýyr zardaptarǵa ákep soqtyrǵan bilikti asyra paidalaný" baby boiynsha sotqa deiingi tergeý bastaldy.
Alaida kúdiktiniń advokaty Serjan Piráliev tergeý sharalarymen kelispei, marqumnyń aiaqkiiminde jáne aýzynda ózge adamdardyń biomaterialy anyqtalǵanyn málimdegen bolatyn.
Onyń aitýynsha, qorǵap jatqan kúdiktiniń DNQ-sy tabylmaǵan. Ishki ister ministrligi advokatty etikany buzǵany úshin aiyptady. Al Áskeri prokýratýra Jambyl oblysyndaǵy "Shóldala" shekara zastavasynda bolǵan sarbazdyń sýitsidi boiynsha tergeýdi qaita bastaýǵa sheshim qabyldaǵan edi.
Sondai-aq Bas áskeri prokýratýra "Shóldala" shekara zastavasynda ózine qol jumsaǵan Bekbol Mirashtyń seksýaldy zorlyq-zombylyqqa ushyraǵany týraly derek rastalmaǵanyn málimdedi.
