Foto: gov.kz
Qylmystyq ister jónindegi sot alqasy shekara zastavasynyń serjanty N.-ǵa qatysty kúsh qoldaný arqyly qorqytyp alý (QR QK-niń 194-baby 2-bóliginiń 1-tarmaǵy) jáne bilikti asyra paidalaný (QR QK-niń 451-babynyń 1-bóligi) baptarymen aiyptalǵan úkimniń kúshin joidy. Oǵan áskeri qyzmetshi B.-ny ózin-ózi óltirýge deiin jetkizdi degen aiyp ta taǵylǵan (QR QK-niń 451-babynyń 2-bóligi jáne 105-baby 2-bóliginiń 1-tarmaǵy), - dep habarlaidy Tengrinews.kz saity QR Áskeri sotynyń baspasóz qyzmetine silteme jasap.
Shymkent garnizony áskeri sotynyń úkimi boiynsha, serjant N. QK-niń 194-baby 2-bóliginiń 1-tarmaǵyndaǵy jáne 451-babynyń 1-bóliginde kózdelgen qylmystar jasaǵany úshin kináli dep tanylyp 3 jyl 6 ai merzimge bas bostandyǵynan aiyrǵan, al, QK-niń 105-baby 2-bóliginiń 1-tarmaǵy jáne 451-babynyń 2-bóligimen kinásiz dep tanylyp, aqtalǵan.
"Sotpen sottalýshy N. shekara zastavasynda kelisimshart boiynsha mobildi toptyń basshysy retinde qyzmet atqarǵany anyqtaldy.
2022 jyldyń tamyzynda ol (sottalýshy N.,) áskeri qyzmetshiler Qarýly Kúshterdiń Jarǵysyn buzyp, nariadtaǵy beketterdi óz erikterimen aýystyrǵanyn anyqtaǵan. Osy sebepti paidalana otyryp, sottalýshy N. qatardaǵy jaýynger Q.-dan aqsha qarajatyn bopsalap, óziniń banktik shotyna aýdarýyn talap etken. Sonymen qatar, sottalýshy N. shekara zastavasynyń aýmaǵynda alkogoldik ishimdikter ishken áskeri qyzmetshiler B., K., A.-ny kórip, óziniń qyzmettik ókiletin asyra paidalanyp, olarǵa dene jaraqattaryn keltirgen", - delingen habarlamada.
Keiin, sottalýshy N. jaǵdaidy paidalanyp, júieli jáne negizsiz túrde, áskeri qyzmetshi B.-nyń ar-namysy men qadir-qasietin qorlaý arqyly sońǵyny ózin-ózi óltirýge deiin jetkizgen.
"Sottalýshynyń kinási jábirlenýshilerdiń, kýálardyń aiǵaqtarymen, zattai dáleldemelerdi qarap tekserýmen, onyń ishinde banktik shottan úzindi kóshirmesimen, shekara zastavasynan alynǵan beinejazbamen jáne qylmystyq istiń basqa da materialdarymen óz dálelin tapqan".
Qylmystyq ister jónindegi sot alqasynyń úkimimen áskeri qyzmetshi N. QK-niń 194-baby 2-bólimniń 1-tarmaǵyndaǵy jáne 451-babynyń 1-bóliginde kózdelgen qylmystar jasaǵany úshin kináli dep tanylyp, 7 jyl merzimge bas bostandyǵynan aiyrý túrindegi jaza taǵaiyndady.
Úkim zańdy kúshine endi.
