Túrkistan oblysynyń ákimi Ómirzaq Shókeev Japoniianyń Qazaqstandaǵy Tótenshe jáne Ókiletti Elshisi Tatsýhiko Kasaidy jáne japondyq Kawasaki men Marubeni kompaniiasynyń ókilderin qabyldady, dep habarlaidy "Ult aqparat".
Aimaq basshysynyń baspasóz qyzmetinen málim etkendei, kezdesýde taraptar ekijaqty qarym-qatynastardy damytý máselelerin talqylady.
Ó.Shókeevtiń aitýynsha, Japoniia - Qazaqstan Respýblikasy jáne sonyń ishinde Túrkistan oblysy úshin mańyzdy strategiialyq seriktesterdiń biri. Kúnshyǵys elinen óńirge gerbitsidterdiń úlken kólemi importtalady.
«Túrkistan oblysy men Japoniia arasynda ózara tiimdi óndiristik, saýda-ekonomikalyq jáne investitsiialyq yntymaqtastyqty arttyrý úshin úlken perspektivalar bar ekenine senimdimin. Biz birlesken jobalardy iske asyrý úshin tolyq qoldaý kórsetýge daiynbyz», - dedi ol.
Sonymen qatar oblys ákimi Túrkistan óńiriniń týrizm jáne agrarlyq ónerkásip salasyndaǵy joǵary áleýetin atap ótti. Osylaisha, aldaǵy ýaqytta sheteldiktermen ortaq múddemiz ushtasqan jobalardy iske asyrýǵa qazaqstandyq jáne japondyq kompaniialar tartylýy múmkin. Kawasaki kompaniiasy Túrkistan qalasyndaǵy 50 mvt bý-gaz elektr stansysyn salý jobasy úshin óz tehnologiiasyn usyndy. Óz kezeginde oblys ákimi japondyq ónim sapasyn joǵary baǵalaityndyǵyn bildirdi, aldaǵy konkýrstarǵa qatysýdy usynyp, sáttilik tiledi.
Aita ketý kerek, biylǵy jyldyń 8 aiynyń qorytyndysy boiynsha oblysqa Japoniiadan jalpy somasy 513 myń AQSh dollaryn quraityn taýarlar importtalǵan. Onyń basym bóligi avtomobilder men olardyń jiyntyqtary, gerbitsidter men elektr quraldary. Qazaqstanda qazirdiń ózinde japon kapitalynyń qatysýymen munai men gaz, metallýrgiia, qarjy, taý-ken ónerkásibi, avtomobilderdi kóterme baǵamen satý, elektr bailanysy, aǵash daiyndaý jáne logistika siiaqty salalarda 80-ge jýyq kásiporyn jumys isteidi.
