Memleket basshysy Qasym-Jomart Toqaev Túrkistan oblysynyń ákimi Ómirzaq Shókeevti qabyldady, - dep habarlaidy "Ult aqparat" Aqorda saityna silteme jasap.
Qasym-Jomart Toqaevqa 2021 jyly Túrkistan oblysynda atqarylǵan jumystar týraly esep berildi.
Ómirzaq Shókeevtiń aitýynsha, ekonomikanyń negizgi kórsetkishi – jalpy óńirlik ónim kóleminiń ósimi byltyr 2020 jylmen salystyrǵanda 4,7 paiyzǵa artqan. Aýyl sharýashylyǵy salasynda 906,5 milliard teńgeniń ónimi óndirilip, ósim 101,7 paiyzdy quraǵan. Bul nátije oblystyń respýblikadaǵy úlesi boiynsha ekinshi orynǵa shyqqanyn kórsetedi. Aimaq ákimi «Qarapaiym zattar ekonomikasy» baǵdarlamasy aiasynda 315 joba qarjylandyrylǵanyn aitty.
Prezidentke óńirdegi qurylys qarqynynyń artqany týraly málimet berildi. Qurylys jumystarynyń kólemi 2020 jylmen salystyrǵanda 4,1 paiyzǵa artqan. Ómirzaq Shókeev Túrkistan qalasyn túrki áleminiń mádeni-rýhani ortalyǵy retinde qalyptastyrý jumystarynyń birinshi kezeńi aiaqtalyp, áleýmettik infraqurylymnyń negizi qalanǵanyn jetkizdi. Onyń aitýynsha, oblystyń 2021-2025 jyldarǵa arnalǵan jańa keshendi jospary bekitilgen.
Oblys ákimi «Halyq únine qulaq asatyn memleket» tujyrymdamasyna sáikes, Sairam aýdanynda júzege asyrylǵan «Parasat» diskýssiialyq klýby pilottyq jobasy týraly baiandady. Atalǵan joba oblys, aýdan, aimaqtaǵy kúshtik qurylym basshylarynyń turǵyndarmen kezdesýlerin, ashyq áńgimelesýlerin qamtamasyz etedi.
Qasym-Jomart Toqaev Túrkistan oblysynda atqarylyp jatqan jumystarǵa oń baǵa bere otyryp, qolǵa alynǵan jobalardy jalǵastyrýdy jáne halyqpen tyǵyz jumys isteý máselesin kúsheitýdi tapsyrdy.
