Qazaqstan Jazýshylar odaǵynyń múshesi, Shyǵys Qazaqstan oblysy Abai aýdany Qaraýyl gimnaziiasynyń muǵalimi Tólegen Janǵaliev Abai kúniniń mán-maǵynasy zor ekendigin aitty, dep habarlaidy QazAqparat.
«Abai barsha qazaqty qarańǵy túnde jol silter temirqazyq ispetti bilimge, ǵylymǵa shaqyryp, jaman qasietterden ada bolýǵa úndegen kemeńger tulǵa. Mine dál osy jaily Prezidentimiz Qasym-Jomart Toqaev «Abai – rýhani reformator» atty maqalasynda ashyp aitty. Birinshiden, 10 tamyz resmi túrde Abai kúni bolyp bekitilgeni áste durys boldy. Sebebi eldiń basym bóliginde hakimniń mereitoiy osy kúnde ótkizilse, Semeidegi ziialy qaýym 23 tamyzda atap ótip júrgen. Biyldan bastap bul da birizdilikke tústi. Abai kúniniń mán-maǵynasy zor. Osy kúndi halyq Memleket basshysy aitqandai «toi toilap emes, oi oilap ótkizý kerek». Eger biz aitys uiymdastyryp, as berip, at jarystyrýmen ǵana shektelsek, bul merekeniń basqadan qandai aiyrmashylyǵy bolmaq?! Abai kúninde hakimniń ǵana emes, ol jaily jazylǵan jańa óleńderdi, áńgimelerdi, shyǵarylǵan ánder men kúilerdi dúiim jurtqa usyný qajet dep esepteimin», - deidi ol.
Qasym-Jomart Toqaev óz maqalasynda mereitoilyq birqatar is-shara onlain formatqa aýystyrylǵanyn jetkizdi. Tólegen Janǵaliev bul sheshimniń koronavirýs infektsiiasynyń taralý qaýpine bailanysty durystyǵyna shúbá keltirmeidi.
«Prezidentimizdiń ózi Abaidyń óleńderin jatqa aityp, chellendj bastap, ony búkil álem qoldaǵany belgili. Negizinen osyndai sharalardyń barlyǵy keleshek urpaq úshin júrgizilip jatyr deýge bolady. Sebebi Abaidy oqý, tanyp-bilý arqyly sanaly urpaq qalyptasatyny sózsiz. Uly aqynnyń 175 jyldyǵy aiasynda hakimniń týǵan jeri abattandyrylyp, Qaraýylda mektep salyndy. Budan bólek te atqarylyp jatqan igi jumystar az emes», - deidi ustaz.
