Kesheli beri áleýmettik jelide taralǵan Shyǵys Qazaqstan oblysynyń Tarbaǵatai aýdany, Kókjyra aýyly turǵyndarynyń Prezidentke joldaǵan Ashyq hatynda jazylǵan derekter jalǵan bolyp shyqty, dep habarlaidy "Ult aqparat".
Al atalǵan hattyń sońynda aty-jónderi jazylyp júrgen aýyl turǵyndary bolsa eshqandai qaǵazǵa qol qoimaǵanyn, bul týraly múldem beihabar ekenin aityp tańǵalyp otyr.
Esterińizde bolsa, ShQO, Tarbaǵatai aýdany, Kókjyra aýylynyń bir top turǵyny áleýmettik jelide Memleket basshysy Qasym-Jomart Toqaevqa «Árýaqtardy kúńirentpeiik» degen taqyrypta ashyq hat jazǵan. Ashyq hatta belsendiler osy aýdannyń «Eleke sazy» dep atalatyn jerinde 2017 jyldan beri júrgizilip kele jatqan arheologiialyq jumystardyń saldarynan, iaǵni qabirdegi árýaqtardy mazalaǵandyqtan jergilikti jerde ólim-jitim kóbeiip, keleńsiz jaǵdailar jiilep ketkenin alǵa tartqan. Alaida bul aqparat shyndyqqa janaspaidy. Osy jaǵdaiǵa bailanysty ǵalymdar, tarihshylar, arheoologtar jáne din ókilderi ózderiniń pikirin bildirip, jelide taralǵan jelsózge toqtaý aitty.
«Aýyldaǵy keleńsiz áleýmettik qubylystardyń negizgi sebebin arheologiialyq qazba jumystarynan izdeýdi – belgili bir toptyń óz aram oiyn júzege asyrýdyń quraly dep qaraý kerek. Qazba jumystary júrgizilgen nysandarda eshqashan adamnyń, maldyń súiekteri shashylmaidy, kerisinshe, taldap, jinalyp alynady. Sebebi, tarihi zertteýlerdegi asa qundy derekkóz bolyp tabylatyn materialdardy arnaiy mamandar – antropologtar, paleogenetikter jáne paleozoologtar zertteidi. Máskeýden kelgen adamdar, osy qatardaǵy mamandar. Nysandardyń barlyǵy qaitadan jabylady, asa qundy eskertkishter aspan astyndaǵy mýzeilerge ainalady, olardyń jobalary jasalýda», - deidi belgili arheolog Zeineolla Samashev.
Qorymdardy qazyp, arheologiialyq zertteý jumystaryn júrgizý shariǵatqa qaishy áreket emes ekenin imamdar da túsindirip berdi.
«Jalpy ejelgi tarihi oryndarǵa arheologiialyq jumystar burynnan júrgizilip keledi. Onyń ózindik jón-josyǵy, tártibi bolady. Din buǵan qarsy emes. Al endi qabirdi qazyp, máiitti qorlaityn bolsa áńgime bólek, ondaiǵa jol berilmeidi, – deidi Qazaqstan musylmandary dini basqarmasynyń Semei óńiri boiynsha ókil imamy Asqar Muqanov.
Bul máselege bailanysty aýdan ákimi men jaýapty sala ókilderi aýyl turǵyndarymen sóilesip, jaǵdaidy túsindirdi. Kókeidegi saýaldaryna tolyq jaýap alǵan jurtshylyq ózderiniń syrtynan qol qoiǵan adamdardyń áreketin qatań synǵa alyp, yńǵaisyzdyq úshin ǵafý ótindi. Soǵan qarǵanda, bul árekettiń artynda halyqtyń atyn paidalanyp, Eleke sazyndaǵy qazba jumystaryna kedergi keltirýdi kózdegen aram piǵyldy adamdar turǵany aidan anyq. Sondyqtan aýdan basshylyǵy turǵyndarǵa el ishinde tarap ketken jalǵan qaýesetke erip, arandap qalmaý qajettigin eskertti.
