Shyǵys Qazaqstan oblysynda joǵalyp ketken balyqshylardy izdestirý jalǵasýda, dep habarlaidy "Ult aqparat".
ShQO TJD qutqarýshylary 20 qarashada Tarbaǵatai aýdanyndaǵy Zaisan kólinde joǵalyp ketken 1990 jáne 1981 jylǵy eki balyqshyny izdeýdi jalǵastyrýda.
«Qutqarýshylar habar túse salysymen oqiǵa ornyna ákimdik ókilderimen birge dereý kelip jetken bolatyn. Birinshi kezekte Tarbaǵatai aýdanynyń jergilikti balyqshylarynyń qaiyqqa shyǵý múmkindigi qarastyryldy. Alaida aýa raiynyń ózgerýinen, atap aitqanda qabyrshaq muzdyń saldarynan katermen shyǵýǵa múmkindik bolmady. Kúrshim aýdany Aqsýat aýyly jaǵynan da osyndai jaǵdai qalyptasty, - dep habarlady ShQO TJD baspasóz qyzmeti.
21 qarasha kúni Zaisan kólinde aerovizýaldy tekserý júrgizý jáne balyqshylardy izdeý úshin jergilikti atqarýshy organdarmen birlesip, ShQO ákimdiginiń MI-8 tikushaǵy jumyldyrylǵan. Saǵat 13.06-da jergilikti turǵyndar jaǵadan 1 shaqyrym qashyqtyqta joǵalǵan balyqshylardyń qaiyǵynyń bos benzin bagyn taýyp aldy. Izdeýge turǵyndar (20 jeńil avtokólik, 50 adam, 1 kvadrokopter), politsiia (3 birlik tehnika, 10 qyzmetker, 1 kvadrokopter), ShQO TJD-dan 10 qutqarýshy qatysqan.
«22 qarashada TJD JQJ súńgýirleri arnaiy jabdyqtyń kómegimen kúni boiy muz astynan izdeý jumystaryn júrgizdi. Izdeýge jergilikti turǵandar da belsene qatysty. Keshke qarai qaiyq tabyldy. Qutqarýshylar men turǵyndar qaiyqty muz astynan alyp shyqty. 23 qarashadan bastap búgingi kúnge deiin kúni boiy súńgýirler sýasty izdeý jumystaryn júrgizýde. 27-29 qarasha aralyǵynda kúrteshe, balyq tolǵan qap jáne aý tabylǵan. Kúndelikti 30 balyqshy qutqarýshylarǵa kómek retinde jaǵalaýdan 1,5 shaqyrymdy súzip ótýde, - dep habarlady vedomstvo ókilderi.
