Shyǵys Qazaqstan oblysy Zaisan qalasynda turatyn 12 jastaǵy Temirlan Erlanuly karantin kezindegi bos ýaqytyn tiimdi paidalanýda. Jas ónertapqysh eski tońazytqyshtan jumyrtqadan balapan shyǵaratyn apparat jasady. Búginde onyń inkýbatorynan 50 balapan shyqqan.
Temirlan Zaisan qalasyndaǵy Lomonosov atyndaǵy orta mektepte 7 synypta oqidy. Talaby taýdai órenniń anasy Almagúl Túsipjanovanyń aitýynsha, únemi jańashyldyqqa umtylatyn ol bastaǵan isin sońyna jetkizbei tynbaityn eńbekqor.
«Temirlan bizdiń úidiń kenjesi. Kishkentai kezinen bi bilep, án aitqandy jaqsy kóredi. Óse kele rýbik tekshesin qurastyrýǵa qyzyǵýshylyǵy oianǵan. Birde ol bizge inkýbator jasaǵysy keletindigin aitty. Tipti ony qalai isteitinin búge-shúgesine deiin túsindirdi. Sóitip ulymyzdyń bastamasyna qoldaý bildirdik. Ákesi oǵan eski tońazytqysh pen kerekti qural-jabdyqtardy ákelip bergen soń, Temirlan birden iske kiristi», - deidi sheshesi.
Osylaisha jas ónertapqysh 22 naýryzda inkýbator jasaýdy bastaǵan. Aldyn ala jospar quryp, qalai isteitinin qaǵazǵa ret-retimen túsirgen.
«Eń birinshi tońazytqyshty burǵymen tesip, jeldetkish jasadyq. Sodan keiin oǵan termorettegish pen gidrometr ornattyq. Termorettegish arqyly biz jumyrtqaǵa kerekti temperatýrany rettesek, al gidrometr apparattyń ylǵaldylyǵyn tekserýge múmkindik beredi. Sondai-aq transformator qoiyp, tońazytqyshtyń ishin jeldetip otyrdyq», - deidi oqýshy.
Bári ázir bolǵan soń ol inkýbatordyń ishine 95 jumyrtqa salypty. Arada bir apta ótken soń ovoskoppen tekserse onyń 11-inen balapan shyqpaityny belgili bolǵan.
«Jiyrma bir kúnnen keiin 30, al kelesi kúni 20 balapan shyqty. Sóitip, 84 jumyrtqadan 50 balapan aldyq. Olarǵa alǵashqy aptada ár 2 saǵat saiyn jem berdim. Qazir 3 saǵatta bir tamaqtandyramyn», - deidi Temirlan Erlanuly.
Aldaǵy ýaqytta da ol inkýbator arqyly jumyrtqadan balapan shyǵaryp, bul isin kásipke ainaldyrǵysy keledi. Áke-sheshesi de uldaryna qoldaý kórsetýge ázir ekendikterin jetkizdi.
