Shyǵys Qazaqstan oblysy Katonqaraǵai aýdanynda túrmege jazyqsyz qamalǵan azamat bostandyqqa shyqty, dep habarlaidy QazAqparat.
Oblystyq sot tóraǵasynyń mindetin atqarýshy Qairat Chakpantaevtyń aitýynsha, ekskavatorshy Esmurat Áýbákirov Shyńǵystai aýylynda sý qubyryn tartý jumystaryn júrgizgen. Osy jyldyń qyrkúiek aiynda oǵan ekskavatordy aidap áketti jáne tehnikanyń buzylýyna bailanysty jumys berýshige iri materialdyq shyǵyn keltirdi degen aiyp taǵyldy. Aýdandyq №2 sotynyń úkimimen azamat bes jylǵa bas bostandyǵynan aiyryldy. Alaida belgili bolǵandai, sot protsesinde kóptegen zańsyzdyq oryn alǵan.
Jumys kúnderiniń birinde Esmurat Áýbákirov sý qubyrlaryn tartý úshin ekskavatormen aryq qazyp jatty. Jumys ýaqyty bitkende tehnikany aýlaǵa qaldyryp, dosymen syra ishken. Sol kezde kóshe turǵyndarynyń biri kelip, odan úi aýlasyndaǵy jerdi tegistep berýin surady. Er adam ishimdik ishkenine qaramastan rýlge otyryp, oǵan kómek kórsetken. Osy sátte ekskavatordyń shlangisi jarylyp, esigi zaqymdandy. Sóitip, jumys berýshi quqyq qorǵaý organdaryna aryz túsirgen.
Esmurat Áýbákirovtiń advokaty Liýbov Serdiýkovanyń sózinshe, atalǵan fakti boiynsha qaralǵan sot isinde politsiia, prokýror, sot jáne memlekettik advokat tarapynan talai zańbuzýshylyqqa jol berildi.
«Aiyptalýshynyń bir áreketi úshin eki ret sottalýy – adamnyń konstitýtsiialyq quqyqtarynyń óreskel buzylýy. Osy oqiǵadan keiin Ákimshilik quqyq buzýshylyq ister jónindegi sot er adamdy mas kúiinde kólik júrgizgeni úshin qamaýǵa alý týraly úkim shyǵaryp, júrgizýshi kýáliginen aiyrdy. Sondai-aq jumys berýshige tóleýge tiis materialdyq shyǵyn mólsherin aiqyndady. Esmurat bul jazany ótep shyqty. Sodan soń ekskavatordy aidap áketti degen aiyp taǵylyp, qylmystyq is qozǵaldy», - deidi ol.
Esmurat Áýbákirov eńbek sharty boiynsha ózi jumys istegen ekskavatordy aidap áketkeni úshin jaýapqa tartylǵan. Alaida jumys berýshimen kelisimshart boiynsha ekskavator er adamǵa onyń qyzmettik mindetterine bailanysty arnaiy bekitilgen.
«Atalǵan kelisim boiynsha tehnikanyń saqtalatyn orny dep sottalǵannyń sol kezdegi turǵylyqty mekenjaiy kórsetilgen. Ol ekskavatordy ózi jóndep, materialdyq jaýapkershilikti moinyna alyp otyrdy. Iaǵni, Áýbákirov kólikti zańdy túrde basqarǵan. Al QR QK-niń 200-baby – kólik quralyn zańsyz aidap áketýge qatysty», - dedi Qairat Chakpantaev.
Budan bólek, sotqa deiingi tergeý satysynda aiyptalýshyǵa advokat berilmegen. Al sot otyrysynda aýdarmashy da bolmapty.
«Esmurat QHR elinde týyp, Otanyna kóship kelgen qandas. Mektepte qazaq tilin oqyǵan ol oryssha múlde bilmeidi. Sondai-aq birinshi satydaǵy sot otyrysynda memlekettik advokat aiyptalýshyǵa qysym kórsetip, óz kinásin moiyndaýǵa kóndirgen. Qazirgi ýaqytta sol quqyq qorǵaýshyǵa qatysty oblystyq advokattar alqasyna jeke uiǵarym shyǵaryldy», - deidi Liýbov Serdiýkova.
Búginde apelliatsiialyq sot aýdandyq sot úkiminiń sheshimin joidy. Osylaisha, 2 ai boiy túrmede ádiletsiz otyrǵan Esmurat Áýbákirov bostandyqqa shyqty. Endi onyń ózine keltirilgen moraldyq zalaldy óndirip alýyna tolyqtai quqyǵy bar.
