Shyǵys Qazaqstan oblysynda kóktemgi sý tasqynynyń aldyn alý úshin arnaiy qurylǵan komissiia jumysyn bastady, dep habarlaidy "Ult aqparat".
Tórt toptan turatyn komissiiaǵa ShQO tótenshe jaǵdailar departamentiniń qutqarýshylary men jergilikti atqarýshy organ ókilderi kiredi.
Búginde sý basý qaýpi bar barlyq ýchaskeler jiti tekserilýde.
«Sý tasqynyna qarsy sharalar josparyn» jáne «Sý tasqyny qaýpiniń aldyn alý boiynsha sharalar kesheni» jol kartasyn júzege asyrýǵa sáikes kózdelgen barlyq mindetter egjei-tegjeili oryndalady. Oblys aýdandarynda sý tasqynyn boldyrmas úshin jaǵalaýdy bekitý jáne bógetterdiń túbin tereńdetý syndy jumystar atqarylýda. Sonymen qatar komissiia tasqyn kezinde azamattardy ýaqytsha ornalastyrý oryndarynyń daiyndyǵyn, inertti materialdar qory men tehnikanyń jaǵdaiyn da qadaǵalaidy» delingen habarlamada.
«Kazgidromet» RMK filialynyń aqparaty boiynsha Shyǵys Qazaqstandaǵy qar jamylǵysynyń biiktigi 7-den 56 sm-ge deiin jetedi.
Óńirdegi sinoptikterdiń boljamyna sáikes, ózenderdiń tasýy ádette naýryzdyń ekinshi onkúndiginen bastap maýsymǵa deiin jalǵasýy múmkin.
«Sý deńgeiiniń kóterilý qarqyny jáne qardyń erýi – aýa temperatýrasynyń kúrt jylýyna nemese jaýynnyń jii jaýýyna tikelei bailanysty. Aldaǵy ýaqytta ShQO ákimdiginde tótenshe jaǵdailar komissiiasynyń otyrysy ótkizilmek. Onda tasqynǵa qarsy turý boiynsha barlyq negizgi máseleler qarastyrylady» delingen vedomstvo málimetinde.
