Búgin Shyǵys Qazaqstan oblysy ákiminiń orynbasary Almashan Smatlaev bastaǵan arnaiy jumys toby bas merdiger «Sinsin» kompaniiasy júrgizip jatqan «Qalbataý-Maiqapshaǵai» jol jóndeý ýchaskesindegi jumysshylarmen kezdesti, dep habarlaidy "Ult aqparat" ákimniń baspasóz qyzmetine silteme jasap.
Óńir basshysy Danial Ahmetovtiń tapsyrmasyna sáikes iske kirisken jumys tobynyń quramynda oblystyq prokýratýra, oblystyq politsiia departamenti, oblystyq eńbek inspetsiiasy basqarmasy, Kólik jáne avtomobil joldary basqarmasynyń basshylary, Taýar jáne qyzmet qaýipsizdigi sapasyn baqylaý departamenti, «QazAvtoJol» AQ ShQOF basshylary bar.
Jumysshylardyń qoiǵan basty talaby – jumys jáne turý sharttaryn jaqsartý, jalaqy mólsherin kóterý. Kezdesý barysynda oblys basshylyǵymen «Sinsin» kompaniiasynyń bas direktory arasynda ortaq kelisim hattamasyna qol qoiyldy. Oǵan sáikes barlyq eńbek kelisimderi QR zańnamasyna sáikes retke keltirilip, jumysshylarǵa 3 kún merziminde túsindiriletin bolady.
«Eger jumysshylar túngi ýaqytta, demalys kúnderi, belgilengen ýaqyttan tys eńbek etse, jalaqy mólsheri 1,5 ese kóleminde tólenedi. 10 kún ishinde barlyq turǵylyqty jerlerde salqyndatqyshtar ornatylyp, QR zańnamasyna sáikes retke keltiriledi.
Barlyq jumysshylarǵa 10 kún merziminde arnaiy jumys kiimi beriletin bolady. Jumysshylardyń turatyn jerlerinde kúnine úsh ret tamaqtandyrý uiymdastyrylady. Jumysshylardyń eń tómengi jalaqy mólsheri 80 myńnan 120 myń teńgege kóteriledi. Jalpy jumysshylardyń jalaqysy atqarǵan jumystaryna sáikes 120 myńnan 360 myń teńgege deiin bolady», delingen habarlamada.
Ákimdiktiń málimetinshe, jaǵdai qalypqa keltirilgen, mekeme kestege sáikes jumys istep tur. Saǵat 14.00-ge qarai barlyq jumysshylar óz mindetterin atqarýǵa kiristi. Jumysshylar oblys basshylyǵyna máseleni tezdetip sheship jáne kórsetilgen kómekteri úshin rizashylyqtaryn bildirdi.
Budan tys, ShQO boiynsha memlekettik eńbek inspektsiiasy basqarmasyna, «QazAvtoJol» AQ ShQOF-na (kelisim boiynsha) jáne ózge jaýapty quzyrly organdar aldyna Qazaqstan Respýblikasy zańnamasyna sáikes eńbek kelisimderine tekserý jumystaryn júrgizý mindeti júkteldi. Sonymen qatar jol qurylysy men jóndeý jumystaryna jumyldyrylǵan sheteldik kompaniialardaǵy qazaqstandyq jumysshylarǵa jalaqy tóleý men eńbek jaǵdaiyn jasaýdy baqylaý mindettelip otyr.
Hattamanyń oryndalýyna ShQO ákimdigi tarapynan baqylaý júrgiziledi.
