Shyǵys Qazaqstan oblysynda politsiia qyzmetkerleri mal urlyǵyna qatysty 13 qylmysty ashty, dep habarlaidy "Ult aqparat".
ShQO Politsiia departamenti baspasóz qyzmetiniń málimetine súiensek, mal urlyǵyna qatysty qylmystardy ashý jáne aldyn alý maqsatynda óńir boiynsha «Mal urlyǵy» jedel aldyn alý sharasy júrgizildi.
«Únemi aýyl turǵyndary men sharýa qojalyqtary ielerine mal jaiý erejelerin saqtaý qajettiligi týraly túsindirý jumystaryn júrgizemiz. Óitkeni úi janýarlaryn qaraýsyz qaldyrý, ádette urlyqqa alyp keledi», - dedi ShQO PD bastyǵynyń orynbasary Talǵat Shaiahmetov.
Shara barysynda mal urlyǵyna qatysty 13 qylmys ashylyp, 28 bas mal ielerine qaitaryldy. Qaraýsyz jaiylǵan 950-den astam úi janýary arnaiy turaqqa aidaldy. QR ÁQBtK-niń 408-babyna sáikes, maldardyń 313 iesi ákimshilik jaýapkershilikke tartyldy.
Máselen, Ulan aýdanynyń politsiia bólimine 51 jastaǵy jergilikti turǵyn habarlasqan. Óz sózinde ol belgisiz bireýdiń erkin jaiylymnan iri qara malyn urlap ketkenin jetkizdi. Keltirilgen materialdyq shyǵyn mólsheri – 250 000 teńgeden asqan. Jedel-izdestirý sharalary barysynda politseiler 34 jastaǵy er adamdy ustady. Kúdikti óz kinásin moiyndap otyr. Qazirgi ýaqytta atalǵan fakti boiynsha QR QK-niń 188-baby 1-bóligimen sotqa deiingi tergeý amaldary júrgizilýde.
Sonymen qatar 188 avtokólik tekserilip, tiisti qujattarsyz mal men et ónimderin tasymaldaý, satý boiynsha 20-dan astam ákimshilik quqyq buzýshylyq anyqtalǵan. 400-den astam sharýa qojalyqtary tekserildi.
Aita keteiik, 2021 jyldyń alǵashqy úsh aiynda Shyǵys Qazaqstanda 413 bas mal urlanǵan. Politseiler 299 maldy ielerine qaitardy.
