Semei qalasynda koronavirýs juqtyrǵan erli-zaiypty Mysyrda demalysta bolyp, 21 naýryz kúni elge kelgen.
Bul jaily oblys ákimi Danial Ahmetov óziniń Facebook paraqshasynda jazdy .
«Semeide koronavirýs dertiniń alǵashqy 2 jaǵdaiy rastaldy. Olar 2020 jyldyń 21 naýryzynda elimizge «Sharm-El-Sheih – Nur-Cultan» reisimen oralyp, ary qarai óz kólikterimen Semeige jetken», - deidi aimaq basshysy.
Olarmen birge otbasy músheleri, iaǵni taǵy 5 adam bolypty. 2020 jylǵy 28 naýryzda júrgizilgen COVID-19 synamasy tórt adamda teris nátije kórsetken. Bir synama nátijesi áli anyqtalǵan joq.
«Sonymen qatar, olarmen bailanysta bolǵan taǵy bir adam anyqtaldy. Onyń da analizi tekserýge alynǵan. Qazirgi tańda tórteýi provizorlyq statsionarǵa oqshaýlanǵan, qalǵan tórteýi karantindik statsionarda dárigerlerdiń baqylaýynda. Naýqastardyń jaǵdaiy ortasha deńgeide. Alǵashqy shaǵymdary dene qyzýy men sirek jótelge bolǵan. Jedel meditsinalyq kómek brigadasy shuǵyl áreket etip, algoritmge sáikes arnaiy kapsýlalarda olardy statsionarǵa jetkizdi. Qazirgi ýaqytta bul adamdar turatyn oryndarǵa dezinfektsiia jumystary júrgizilýde», - dep tolyqtyrdy ákim.
