Shyǵys Qazaqstan oblysynda qutqarýshylar en dalada joǵalyp ketken eki adamdy tapty, dep habarlaidy "Ult aqparat".
ShQO Tótenshe jaǵdailar departamenti baspasóz qyzmetiniń málimetine súiensek, 13 qańtarda Katonqaraǵai aýdanynda 1982 jáne 1988 jylǵy eki er adam Novo-Hairýzovka aýylynan Alybai aýylyna qarai «VAZ 2114» kóligimen jolǵa shyqqan. Alaida jol-jónekei kólik qarǵa batyp qaldy.
Olardy shuǵyl izdestirýge kirisken «№27 órt sóndirý bóliminiń qyzmetkerleri men politseiler saǵat 21.30-da Novo-Hairýzovka men Alybai aýyldary arasyndaǵy tasjoldan 15 shaqyrymdai jerden tapty. Alǵashqy meditsinalyq kómek kórsetý úshin er adamdar ortalyq aýdandyq aýrýhanaǵa jetkizilgen. Azamattardyń aitýynsha, kólik ishinde tońyp qalmas úshin olar qaǵaz jaǵyp otyrǵan», - dep habarlady vedomstvo ókilderi.
Osy rette, TJD turǵyndarǵa alys saparǵa shyǵar aldynda joldardyń jai-kúiin «Dármen» mobildi qosymshasy arqyly tekserip otyrýǵa keńes beredi.
