Shyǵys Qazaqstan oblysynyń Aqkól aýylyndaǵy bir ǵasyrdan astam tarihy bar sáýlet eskertkishi qiraý aldynda tur. Onyń ereksheligi, aǵashtan salynǵan ǵimaratta birde-bir shege qoldanylmaǵan, dep habarlaidy «Habar 24».
Kezinde meshit bolǵan nysan, biraz jyldan beri apatty jaǵdaida tur. Irgetasy jermen jeksen bolyp, aǵash beldikteri ábden shirip ketken.
Aqkól aýylynda qazir birneshe úi ǵana qalǵan. Solardyń birinde zeinetker Gúlshira ájei turady. Biraq ol kisi kóshpeitinin aitady. Sebebi meshit ǵimaratyn qaraýsyz qaldyryp ketkisi kelmeidi.
«Tóbesiniń qańyltyry ushyp ketti. Munaralary áli qulamaidy», - deidi Gúlshira Saparieva.
Bul meshitti osydan 111 jyl buryn jergilikti Sultan Fazylbekov esimdi azamat salǵan eken. Ǵimarattyń qurylys jumystaryna Bashqurtstannyń eń myqty degen sáýletshilerin jumyldyrypty. Al qurylys materialdary búkil Ertis jaǵasyndaǵy eldi mekenderden jetkizilgen kórinedi. Ǵimarat meshit retinde 10 jyl ǵana paidalanylǵan. Keiinnen Keńes úkimetiniń tusynda munda bastaýysh mektep bolǵan. Aýyl turǵyny Málika Naýryzbaevanyń aitýynsha, bul ǵimaratty qaitadan qalypqa keltirse, aýyl da ajarlana túsedi.
«Bul jerden tasjol ótip jatyr. Tipti keibir jolaýshylar osynda toqtap, ǵimaratqa tamsanyp qarap ketedi. Iaǵni halyq qyzyǵady degen sóz. Demek bul jerde týrizmdi de damytýǵa bolady», - deidi aýyldyq okrýgtiń qoǵamdyq mediatory Málika Naýryzbaeva.
Biyl jazda bul ǵimaratqa oblystyq tarihi-mádeni murany qorǵaý ortalyǵynyń mamandary da qyzyǵýshylyq tanytypty. Nysandy jan-jaqty zerttegen olar, munda «Rýhani jańǵyrý» baǵdarlamasynyń aiasynda jóndeý jumystaryn júrgizetin bolyp sheshken.
«Aqkól meshiti búgingi kúni qatań baqylaýda tur. Osy maýsym aiynda oblystyq mádeniet basqarmasynan jumys toby kelip, zerttep ketken bolatyn. Meshit jóndeýden ótkiziledi. Biraq qashan, qai ýaqyttarda bolatyny belgisiz. Ony sol jumys toby sheshetin bolady», - deidi Besqaraǵai aýdany ákiminiń orynbasary Baýyrjan Batalov.
Meshitti qalpynda saqtap qalýdy mamandar buryn da qolǵa alǵan eken. Alaida ony oblys ortalyǵyna aparyp qoimaq bolǵan. Biraq buǵan jergilikti turǵyndar qarsy bolypty. Endi aldaǵy ýaqytta atalǵan ǵimarat Aqkól aýylynyń sánine ainalady degen senim mol.
