Shyǵys Qazaqstan oblysynda apatqa ushyraǵan jolaýshylar tikushaǵy Semeidiń burynǵy ákimi Qairat Turlyhanovtyń áieli - Ǵafýra Turlyhanovaǵa tiesili bolǵan, - dep habarlaidy kaz.tengrinews.kz QR IDM Azamattyq aviatsiia komitetiniń ókilderine silteme jasap.
"Strekoza 7-Gazelle SA341" tikushaǵynyń zaýyttan shyqqan nómiri - EEVS.02.0325. 2009 jyldyń 27 tamyzynda qurastyrylǵan. Bort nómiri - UP-LA246, ushý salmaǵy: 1800. 2016 jyldyń 22 jeltoqsanynda tikushaq 1087 nómirimen Qazaqstanda tirkeldi. Ushý jaramdylyǵynyń merzimsiz sertifikaty 2016 jyldyń 23 jeltoqsanynda berildi. Jalpy maqsatta paidalanýǵa ruqsat etilgen.
Tikushaq Turlyhanova Ǵafýra Muhatbekqyzyna tiesili. Ol Semeidiń ákimi, QR Qaýipsizdik keńesi hatshysynyń jáne QR Kólik jáne kommýnikatsiia ministriniń keńesshisi, osy ministrliktiń kólik baqylaý komitetiniń tóraǵasy bolǵan. Ashyq aqparat kózderinde sońǵy jumys orny retinde "Vokzal-Servis" AQ prezidenti dep kórsetilgen. Alaida "Qazaqstan Temir Joly" AQ-daǵy qaita qurýǵa bailanysty kompaniia jabylyp qalǵan edi.
Eske salaiyq, jeke menshiktegi S-341 tikushaǵy keshe Úrjar aýdanyndaǵy Qoja aýylynan ushyp shyǵyp, Aiagóz aýdanyndaǵy Aqshataý aýylyna qonýy kerek bolǵan. Kýágerler tikushaqtyń Aiǵyzdyń ústinen ushqanyn kórgen. Alaida jeter jerine jetpegen. 25 aqpanda saǵat 18.30-da pilot bailanysqa shyqpaǵan. Izdeý sharalary barysynda tikushaq Aiagóz qalasynan soltústik-batysqa qarai 60 shaqyrym jerden tabylǵan.
